ନୂଆଦିଲ୍ଲୀ : ଆମେରିକାର ୨୫ ପ୍ରତିଶତ ଟାରିଫ ପ୍ଲାନ ଏକ ସପ୍ତହା ଘୁଞ୍ଚିଲା । ୭ ଦିନ ପାଇଁ ଭାରତ ସମେତ ସମସ୍ତ ଦେଶକୁ ମିଳିଲା ଆଶ୍ୱସ୍ତି । ଆସନ୍ତା ଅଗଷ୍ଟ ୭ ତାରିଖରୁ ଲାଗୁ ହେବ ନୂଆ ଟାରିଫ । ହ୍ଵାଇଟ୍ ହାଉସ୍ ପକ୍ଷରୁ ଜାରି ଏକ କାର୍ୟ୍ୟକାରୀ ଆଦେଶରେ କୁହାଯାଇଛି ଯେ ଏହି ନୂଆ ଶୁଳ୍କ ଏବେ ଅଗଷ୍ଟ ୭ରୁ ଲାଗୁ ହେବ । ଏକ ସପ୍ତାହ ମହଲତ ଦ୍ୱାରା ପ୍ରଭାବିତ ଦେଶଗୁଡ଼ିକୁ ଆମେରିକା ସହିତ ବାଣିଜ୍ୟିକ ବୁଝାମଣା ପାଇଁ ଆଉ କିଛି ସମୟ ମିଳିପାରିବ ବୋଲି ଆଶା କରାଯାଉଛି । ଏହି ନୂଆ ଶୁଳ୍କ ନୀତି ଅନୁଯାୟୀ, ଆମେରିକାକୁ ରପ୍ତାନି ହେଉଥିବା ଭାରତୀୟ ସାମଗ୍ରୀ ଉପରେ ୨୫% ଶୁଳ୍କ ଲାଗୁ କରାଯିବ । ଟ୍ରମ୍ପ ପ୍ରଶାସନର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ, ଭାରତ ସହ ବାଣିଜ୍ୟ ଆଲୋଚନାରେ ଅଗ୍ରଗତି ନ ହେବାରୁ ଟ୍ରମ୍ପ ଅସନ୍ତୁଷ୍ଟ ଅଛନ୍ତି। ସେ ଭାରତର ବଜାରକୁ ଏକ ବନ୍ଦ ବଜାର ବୋଲି କହିଛନ୍ତି ଏବଂ ବ୍ରିକ୍ସ ସଦସ୍ୟତା ଓ ଋଷରୁ ତେଲ କିଣିବା ଭଳି ଭୂ-ରାଜନୈତିକ ପ୍ରସଙ୍ଗରେ ମଧ୍ୟ ଚିନ୍ତା ପ୍ରକଟ କରିଛନ୍ତି ।
