ଜଗତସିଂହପୁର : ନାଟ୍ୟ ଜଗତର ଅନନ୍ୟ ପ୍ରତିଭା ଭାବରେ ଜଗତସିଂହପୁର ଜିଲ୍ଲା ସମଙ୍ଗ ଗାଁର ସ୍ବର୍ଗତ ଆର୍ତ୍ତବନ୍ଧୁ ରାଉତରାୟଙ୍କ ସ୍ମୃତି ରେ ପାଳନ ହେଉଛି ଉତ୍ସବ ନବରସ ।ଆର୍ତ୍ତବନ୍ଧୁ ସ୍ମୃତି ପରିଷଦ ପକ୍ଷରୁ ଆୟୋଜିତ ଏହି ନବରସ ଉତ୍ସବର ଉଦ୍ଘାଟନୀ ଉତ୍ସବରେ ଉଦ୍ଘାଟକ ଭାବରେ ଗଣଶିକ୍ଷା ମନ୍ତ୍ରୀ ସୁଦାମ ମାରାଣ୍ଡି,ମୁଖ୍ୟ ଅତିଥି ଭାବରେ ସରକାରୀ ମୁଖ୍ୟ ସଚେତକ ପ୍ରଶାନ୍ତ କୁମାର ମୁଦୁଲି, ମୁଖ୍ୟ ବକ୍ତା ବିଶିଷ୍ଟ ଶିକ୍ଷାବିତ ଡକ୍ଟର ଅଜୟ କୁମାର ମିଶ୍ର ,ଜିଲ୍ଲା ପରିଷଦ ଅଧ୍ୟକ୍ଷ ମନୋଜ କୁମାର ଭୋଇ ପ୍ରମୁଖ ଯୋଗ ଦେଇଥିଲେ । ଆର୍ତ୍ତବନ୍ଧୁ ରାଉତରାୟ ଥିଲେ ନାଟ୍ୟ ଜଗତର ଅନନ୍ୟ ପ୍ରତିଭା ।ତାଙ୍କର ଅବଦାନ ନାଟ୍ୟ ଜଗତକୁ ପ୍ରେରଣା ଦେବା ସହିତ ତାଙ୍କର କାଳଜୟୀ ନାଟ୍ୟ ରଚନା ଆଜି ଅମ୍ଳାନ ସ୍ମୃତି ହୋଇ ରହିଛି ବୋଲି କହିଥିଲେ । ସ୍ମୃତି ପରିଷଦ ସଭାପତି ବଦ୍ରୀ ନାରାୟଣ ମହାନ୍ତି ସଭାପତିତ୍ୱ କରିଥିବା ବେଳେ ସମ୍ପାଦକ ତଥା ଆର୍ତ୍ତବନ୍ଧୁ ରାଉତରାୟଙ୍କ ସୁପୁତ୍ର ତପନ ରାଉତରାୟ ସମ୍ପାଦକୀୟ ବିବରଣୀ ପାଠ କରିଥିଲେ ।ଏହି ଅବସରରେ ବହୁ ବରିଷ୍ଠ ମଞ୍ଚ କଳାକାରଙ୍କୁ ପରିଷଦ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା ।ପରେ ସ୍ଥାନୀୟ କଳାକାରଙ୍କ ଦ୍ୱାରା ସାଂସ୍କୃତିକ କାର୍ୟ୍ୟକ୍ରମ ପରିବେଷଣ କରାଯାଇଥିଲା ।
