ନୂଆଦିଲ୍ଲୀ : ଦିଲ୍ଲୀ-ଏନସିଆରରେ ଘନ କୁହୁଡି ଯୋଗୁଁ ୨୨୮ ବିମାନ ବାତିଲ । କମ ଦୃଶ୍ୟମାନ ଯୋଗୁଁ ଦିଲ୍ଲୀ ବିମାନ ବନ୍ଦରରେ ୨୨୮ ବିମାନ ବାତିଲ ହୋଇଛି । ଛାଡିବାକୁ ଥିବା ୧୩୧ ବିମାନ ଓ ପହଁଚିବାକୁ ଥିବା ୯୭ ବିମାନ ବାତିଲ ହୋଇଛି । ଆଉ ୫ ବିମାନର ଗତିପଥରେ ପରିବର୍ତ୍ତନ ହୋଇଛି । ୮୦୦ ଉଦ୍ଧ୍ୱର୍ ବିମାନ ବିଳମ୍ବରେ ଚାଲୁଥିବା ସୂଚନା ରହିଛି । ଫସି ରହିଥିବା ଯାତ୍ରୀଙ୍କ ମଧ୍ୟରେ ତୀବ୍ର ଅସନ୍ତୋଷ ଓ ଆକ୍ରୋଶ ରହିଛି । ଯାତ୍ରୀଙ୍କ ପାଇଁ ବିଭିନ୍ନ ଏୟାରଲାଇନ୍ସ ପକ୍ଷରୁ ଆଡଭାଇଜରି ଜାରି ହୋଇଛି । ବିମାନ ବନ୍ଦରକୁ ଆସିବା ପୂର୍ବରୁ ଫ୍ଲାଇଟ ଷ୍ଟାଟସ ଯାଞ୍ଚ କରିବାକୁ ଅନୁରୋଧ କରାଯାଇଛି ।
ଅନ୍ୟପଟେ ବାୟୁ ଗୁଣବତ୍ତାମାନ ବିପଦଜନକ ସ୍ଥିତିରେ ପହଞ୍ଚିବା ପରେ ଦିଲ୍ଲୀ ସରକାରଙ୍କ ବଡ଼ ନିଷ୍ପତ୍ତି । ଏଣିକି ଅନଲାଇନରେ ହେବ ନର୍ସରୀରୁ ପଞ୍ଚମ ଶ୍ରେଣୀ ପର୍ୟ୍ୟନ୍ତ ପାଠପଢା । ସ୍ବାସ୍ଥ୍ୟଗତ କାରଣକୁ ଦୃଷ୍ଟିରେ ରଖି ସ୍କୁଲକୁ ଛୋଟ ଶିଶୁଙ୍କ ଯାତାୟାତ ବନ୍ଦ କରିଛନ୍ତି ସରକାର । ପରବର୍ତ୍ତୀ ନିର୍ଦ୍ଦେଶ ନ ଆସିବା ପର୍ୟ୍ୟନ୍ତ ଘରେ ରହି ଅନଲାଇନ୍ ମାଧ୍ୟମରେ ପାଠ ପଢିବାକୁ ନିର୍ଦ୍ଦେଶ ଜାରି କରାଯାଇଛି । ନିର୍ଦ୍ଦେଶାବଳୀରେ ପାଞ୍ଚଟି ଦିଗକୁ ଫୋକସ କରାଯାଇଛି । ୫ମ ଶ୍ରେଣୀ ପର୍ୟ୍ୟନ୍ତ କୌଣସି ପିଲା ସ୍କୁଲ ଯିବେ ନାହିଁ । ସେମାନଙ୍କ ପାଠପଢା ସମ୍ପୂର୍ଣ୍ଣ ଅନଲାଇନ୍ ହେବ । ପୂର୍ବରୁ ଛାତ୍ରଛାତ୍ରୀ ଚାହିଁଲେ ହାଇବ୍ରିଡ ମୋଡରେ ସ୍କୁଲ ଯାଇପାରିବେ କିମ୍ବା ଘରେ ପଢିପାରିବାର ବିକଳ୍ପ ଥିଲା । ଏବେ ଏହାକୁ ସମ୍ପୂର୍ଣ୍ଣ ମନା କରାଯାଇଛି ।
