କେନ୍ଦୁଝର : ଧୀରେ ଧୀରେ ଖୋଲୁଛି ଗୁମର । ବାଲେଶ୍ୱର ଏଫଏମ କଲେଜ ଛାତ୍ରୀ ମୃତ୍ୟୁ ଘଟଣାରେ ଅନ୍ୟ ସବୁ ବିଶ୍ୱବିଦ୍ୟାଳୟରେ ନିର୍ଯ୍ୟାତନା ଓ ଅସଦାଚରଣ ଘଟଣା ସାମ୍ନାକୁ ଆସୁଛି । ଏହାରି ଭିତରେ ବର୍ତ୍ତମାନ କେନ୍ଦୁଝର ଧରଣୀଧର ବିଶ୍ଵବିଦ୍ୟାଳୟରେ ୧ ବର୍ଷ ପୂର୍ବରୁ ଗୁରୁ-ଶିଷ୍ୟ ପରମ୍ପରାରେ ଲାଗିଥିବା କଳଙ୍କ ଘଟଣା ଶୁଣିବାକୁ ମିଳୁଛି । ସୂଚନା ଅନୁସାରେ ୧ବର୍ଷ ପୂର୍ବେ ଧରଣୀଧର ବିଶ୍ଵ ବିଦ୍ୟାଳୟର ଇଂରାଜୀ ବିଭାଗର ଅଧ୍ୟାପକ ତାଙ୍କ ସରକାରୀ ବାସଭବନରେ ଜଣେ ଛାତ୍ରୀଙ୍କ ସହ ଆପତ୍ତିଜନକ ଅବସ୍ଥାରେ ଧରାପଡିବା ପରେ ଅଧ୍ୟାପକଙ୍କ ସହକାରୀ ବାସଭବନ ସମ୍ମୁଖରେ ଥିବା ହଷ୍ଟେଲ୍ ର ଛାତ୍ରମାନେ ଏ ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଅବଗତ କରିଥିଲେ । ପରେ ସମ୍ପୃକ୍ତ ଛାତ୍ରୀଙ୍କୁ ଅଧ୍ୟାପକଙ୍କ ସରକାରୀ ବାସଭବନରୁ ଉଦ୍ଧାର କରାଯାଇଥିଲା । ଛାତ୍ରମାନେ ସମ୍ପୃକ୍ତ ଅଧ୍ୟାପକଙ୍କୁ ଘେରାଉ କରିଥିଲେ । ଏ ବିଷୟ ଜଣା ପଡ଼ିବା ପରେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷ ସମ୍ପୃକ୍ତ ଅଧ୍ୟାପକଙ୍କ ବିରୋଧରେ ତୁରନ୍ତ କାର୍ୟ୍ୟାନୁଷ୍ଠାନ ଗ୍ରହଣ କରି ତାଙ୍କୁ ପଦବୀରୁ ବିହିଷ୍କୃତ କରିବା ସହ, ସମ୍ପୃକ୍ତ ଅଧ୍ୟାପକଙ୍କୁ ସରକାରୀ ବାସଭବନରୁ ତଡ଼ି ଦେଇଥିଲେ । ଏହାପରେ ବିଶ୍ଵବିଦ୍ୟାଳୟ ତରଫରୁ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା । ହେଲେ, ସେ ଏହାପାଇଁ କୌଣସି ସନ୍ତୋଷଜନକ ଉତ୍ତର ନଦେବା କାରଣରୁ ତାଙ୍କୁ ଇଂରାଜୀ ବିଭାଗର ସଂଯୋଜକ ପଦରୁ ବହିଷ୍କାର କରାଯାଇଥିଲା । ଏ ସମ୍ପର୍କରେ ଛାତ୍ରମାନେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷଙ୍କ ନିକଟରେ ଜମା କରିଥିବା ଭିଡ଼ିଓ କ୍ଲିପିଙ୍ଗ, ଅଭିଯୋଗ ଆଦି ବିଶ୍ଵବିଦ୍ୟାଳୟ ତରଫରୁ ଗଠନ କରାଯାଇଥିବା ଆଇସିସି କୁ ହସ୍ତାନ୍ତର କରାଯାଇଥିଲା । ବିଗତ ୧ ବର୍ଷ ଧରି ଏ ସମ୍ପର୍କରେ ଆଇସିସି ତଦନ୍ତ ଜାରି ରଖିଥିବା କହିଛନ୍ତି ବିଶ୍ଵବିଦ୍ୟାଳୟର ଓଏସଡି ।
