ଯାଜପୁର: ଜାଲ ନୋଟ୍ କାରବାର କରୁଥିବା ରାକେଟକୁ ଗିରଫ କରିଛି ଯାଜପୁର ପୋଲିସ୍ । ୧୩ ଲକ୍ଷ ଟଙ୍କାର ଜାଲ ନୋଟ ସହ କାଗଜ ଓ ପ୍ରିଣ୍ଟର ମଧ୍ୟ ଜବତ କରାଯାଇଛି । ଗିରଫ ହୋଇଥିବା ଅଭିଯୁକ୍ତ ଜଣକ ମଙ୍ଗଳପୁର ଥାନା କାଟିଆ ଅଞ୍ଚଳର ବୋଲି ଜଣାପଡ଼ିଥିବା ବେଳେ, ସେ ଯାଜପୁର ଟାଉନ ଥାନା ଅଧିନସ୍ଥ ସନ୍ଥ ମହାଦେବ ଗ୍ରାମରେ ଏକ ଭଡ଼ା ଘର ନେଇ ରହୁଥିଲା । ସେହିଠାରେ ସେ ଜାଲ ନୋଟ ଛାପୁଥିବା ନେଇ ପୋଲିସ୍ ପାଖରେ ପୂର୍ବ ସୂଚନା ରହିଥିଲା । ତେଣୁ ପୋଲିସ୍ ଏ ନେଇ ଖୋଳତାଡ଼ କରୁଥିଲା ।
ତେବେ ଗତକାଲି ବିଳମ୍ବିତ ରାତିରେ ଟାଉନ ଥାନା ପୋଲିସ୍ ଅଚାନକ ଚଢ଼ାଉ କରି ସେହି ଭଡ଼ା ଘରୁ ୧୩ ଲକ୍ଷ ଟଙ୍କାର ଜାଲ ନୋଟ୍ ସହ ଅଭିଯୁକ୍ତକୁ ଗିରଫ କରିଛି । ସେଥି ମଧ୍ୟରେ ୫୦୦, ୨୦୦ ଓ ୧୦୦ ଟଙ୍କିଆ ଜାଲ ନୋଟ୍ ଥିବା ସୂଚନା ରହିଛିି । ୨୫ ହଜାର ୧୭ ଟଙ୍କା ଦେଲେ ସେ ଲକ୍ଷେ ଟଙ୍କା ଦେଉଥିବା ଜଣାପଡ଼ିଛି । ଅଭିଯୁକ୍ତ ଜଣକ ଏହି ଜାଲ ନୋଟ କାରବାର ମାମଲାରେ ଗତ ୫ ବର୍ଷ ମଧ୍ୟରେ ୩ ଥର ଗିରଫ ହୋଇସାରିଛି । ତେବେ ଏହି ଜାଲ ନୋଟ କାରବାର ରାଜ୍ୟ ବାହାରକୁ ମଧ୍ୟ ଲମ୍ବିଥିବା କଥା ପୋଲିସ କହିଛିି । ଅଭିଯୁକ୍ତ ଚନ୍ଦ୍ରମଣୀ ସହ ଆଉ କିଏ କିଏ ଏହି ଜାଲ ନୋଟ କାରବାରରେ ସାମିଲ ଅଛନ୍ତି, ସେ ନେଇ ଅଧିକ ଖୋଳତାଡ଼ ଜାରି ରହିଥିବା ପୋଲିସ୍ ସୂଚନା ଦେଇଛି ।
