ବଲାଙ୍ଗୀର: ନୂଆ ବର୍ଷରେ ଭୋଜି କରିବାକୁ ମହଙ୍ଗା ପଡ଼ିଲା ପୋଲିସ୍ ବାବୁଙ୍କ ଛେଳି ଚୋରୀ ପ୍ଲାନ୍ । ଭୋଜି ଖାଇ ନିଲମ୍ବିତ ହେଲେ ଏଏସ୍ଆଇ ସୁମନ୍ ମଲ୍ଲିକ । ଏହି ଘଟଣାଟି ଘଟିଛି ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ଅଞ୍ଚଳରେ । ଏହି ମାମଲାରେ ବଲାଙ୍ଗୀର ଏସ୍ପି ନୀତିନ କୁସଲକର ସୁମନଙ୍କୁ ନିଲମ୍ବିତ କରିଛନ୍ତି ।
ସୂଚନାନୁଯାୟୀ, ଗତ କାଲି ସନ୍ଧ୍ୟାରେ ଏକ ଛେଳି ଥାନା ଭିତରକୁ ପଶି ଯାଇଥିଲା । ସେଠାରେ ଉପସ୍ଥିତ ଥିବା ପୋଲିସ୍ ବାବୁ ଛେଳିଟିକୁ ଅଟକାଇ ଦେଇଥିଲେ । ସେପଟେ ଛେଳିମାଲିକ ରାତି ପର୍ଯ୍ୟନ୍ତ ବହୁ ଖୋଜାଖୋଜି କରିଥିଲେ ସୁଦ୍ଧା ପାଇନଥିଲେ । ଏନେଇ ଛେଳିମାଲିକ ଗ୍ରାମବାସୀଙ୍କୁ ସବୁ କଥା କହିଥିଲେ । ଫଳରେ ଗ୍ରାମବାସୀ ମିଶି ଥାନା ପରିସର ଖୋଜାଖୋଜି କରିଥିଲେ । ଥାନା ପଛପଟେ ଛେଳିର ରକ୍ତ ଓ ହାଡ଼ଗୋଡ଼ ପଡ଼ିଥିବାର ଦେଖିବାକୁ ପାଇଥିଲେ ।
ତେବେ ଛେଳିମାଲିକ ଏନେଇ ଥାନାରେ ଅଭିଯୋଗ କରିଥିଲେ । ଅଭିଯୋଗ କରିବା ଦେଖି ସୁମନ ତାଙ୍କୁ କେଉଁଆଡ଼େ ନେଇ ଯାଇଥିଲେ । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ଉତ୍ୟକ୍ତ ଗ୍ରାମବାସୀ ଏକାଠି ହୋଇ ଥାନା ଘେରାଉ କରି ଅଭିଯୁକ୍ତ ଏଏସ୍ଆଇଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦିବି କରିଥିଲେ । ଆଜି ସକାଳୁ ଏସ୍ପି ନୀତିନଙ୍କ ପାଖରେ ଏହି ମାମଲା ପହଞ୍ଚିଥିଲା । ତେବେ ଏହି ମାମଲାରେ ଏସପି କାର୍ଯ୍ୟାନୁଷ୍ଠାନ ସ୍ୱରୂପ ,ଏସ୍ଆଇ ସୁମନଙ୍କୁ ଚାକିରିରୁ ନିଲମ୍ବିତ କରିଛନ୍ତି ।
