ସମ୍ବଲପୁର: ଧରା ପଡ଼ିଲା ବାଇକ୍ ଲୁଟେରା ଗ୍ୟାଙ୍ଗ । ସମ୍ବଲପୁର ପୋଲିସ ଏମାନଙ୍କୁ ଧରିବାରେ ସକ୍ଷମ ହୋଇଛି । ଲଟେରାମାନଙ୍କ ଠାରୁ ୧୦ ଟି ବାଇକ୍ ୩ଟି ମୋବାଇଲ୍ ଜବତ କରାଯାଇଛି । ଏହି ମାମଲାରେ ସାମିଲ ଥିବା ୩ ଜଣକୁ ଗିରଫ କରିଛି ବୁର୍ଲା ପୋଲିସ । ଗିରଫ ଅଭିଯୁକ୍ତମାନେ ହେଲେ ବୌଦ୍ଧ ଜିଲ୍ଲାର ବିକାଶ ବସ୍ତିଆ, ପ୍ରିତମ ସାହୁ ଓ ଆଶିଷ ପ୍ରଧାନ । ଅଭିଯୁକ୍ତମାନେ ସମ୍ବଲପୁରରୁ ବାଇକ୍ ଚୋରିକରି କନ୍ଧମାଳ ଓ ବୌଦ୍ଧ ଜିଲ୍ଲାରେ ବିକ୍ରି କରୁଥିବା ଜଣା ପଡ଼ିଛି ।
ଖବର ଅନୁଯାୟୀ କତରବଗା ଅଞ୍ଚଳର ଗିରିଧାରୀ ନାଗ ନାମକ ଜଣେ ବ୍ୟକ୍ତି ଭୀମସାର ଆସିଥିଲେ । ବାହାରେ ବାଇକ୍ ରଖିଥିବା ସମୟରେ ସେଠାରୁ ବାଇକଟି ଚୋରି ହୋଇଯାଇଥିଲା । ଭୀମସାରରୁ ବାହାରି ସେ ବାଇକ୍ ନଥିବା ଦେଖି ତୁରନ୍ତ ବୁର୍ଲା ଥାନାରେ ଏନେଇ ଅଭିଯୋଗ କରିଥିଲେ । ଏହି ଅଭିଯୋଗ ଆଧାରରେ ବୁର୍ଲା ପୋଲିସ ଏକ ମାଲା ରୁଜୁ କରି ତଦନ୍ତ କରିଥିଲା । ସେଠାରେ ଥିବା ସିସିଟିଭି ଓ ଅନ୍ୟ ସର୍ଭିଲାନ୍ସ ଯାଞ୍ଚ କରି ଏହି ଅଭିଯୁକ୍ତଙ୍କୁ ଧରିବାରେ ସଫଳ ହୋଇଛି । ଏମାନଙ୍କ ଗ୍ୟାଙ୍ଗରେ ଆଉ ମଧ୍ୟ କିଛି ବ୍ୟକ୍ତି ସାମିଲ ଥିବା ସନ୍ଦେହ କରୁଛି ପୋଲିସ । ସେ ନେଇ ଅଧିକ ପଚରା ଉଚରା ଜାରି ରଖିଛି ।
