ବିବାହର ଦୀର୍ଘ ୨୦ ବର୍ଷ ପରେ ଅଲଗା ହେଲେ ସାଉଥ୍ ସୁପରଷ୍ଟାର ଧନୁଷ ଓ ଐଶ୍ୱର୍ୟ୍ୟା ରଜନୀକାନ୍ତ । ପ୍ରାୟ ୨ ବର୍ଷ ଅଲଗା ରହିବା ପରେ ଚେନ୍ନାଇ ପରିବାର କଲ୍ୟାଣ କୋର୍ଟ ଉଭୟଙ୍କୁ ଛାଡପତ୍ର ଦେଇଛନ୍ତି । ଏହାପୂର୍ବରୁ ଏହି ଛାଡପତ୍ର ମାମଲାର ତିନିଥର ଶୁଣାଣି ହୋଇଛି । ତେବେ ଉଭୟ ଧନୁଷ ଏବଂ ଐଶ୍ୱର୍ୟ୍ୟା ରଜନୀକାନ୍ତ ଏହି ଶୁଣାଣି ଅଧିବେଶନରେ ଯୋଗ ଦେଇନଥିଲେ । ଏବେ ଦୁହେଁ ଶେଷରେ ଛାଡପତ୍ର ପାଇଛନ୍ତି । ପ୍ରାୟ ୨ ବର୍ଷ ପୂର୍ବେ ଧନୁଷ ତାଙ୍କ ପତ୍ନୀ ଐଶ୍ୱର୍ୟ୍ୟାଙ୍କଠାରୁ ଅଲଗା ହେବାର ଖବର ତାଙ୍କ ସୋସିଆଲ ମିଡିଆ ପୋଷ୍ଟରେ ସେୟାର କରିଥିଲେ । ଧନୁଷ ଏକ୍ସ ପୋଷ୍ଟରେ ଲେଖିଥିଲେ, ୧୮ ବର୍ଷର ପ୍ରେମୀ, ବନ୍ଧୁ ଏବଂ ଅଭିଭାବକ ଭାବେ ଏହା ଏକ ଚମତ୍କାର ଯାତ୍ରା ଥିଲା । କିନ୍ତୁ ଆଜି ସମୟ ଆସିଛି ଆମ ଅଲଗା ହେବାର । ଐଶ୍ୱର୍ୟ୍ୟା ମଧ୍ୟ ଧନୁଷଙ୍କ ସହ ସମାନ ପୋଷ୍ଟ ସେୟାର କରିଥିଲେ । ସୂଚନାଯୋଗ୍ୟ ଯେ ଐଶ୍ୱର୍ୟ୍ୟା ହେଉଛନ୍ତି ସାଉଥ୍ ସୁପରଷ୍ଟାର ରଜନୀକାନ୍ତଙ୍କ ଝିଅ । ସେହିପରି ଧନୁଷ ଜଣାଶୁଣା ପ୍ରଯୋଜକ କସ୍ତୁରୀ ରାଜାଙ୍କ ପୁଅ । ଐଶ୍ୱର୍ୟ୍ୟା ଓ ଧନୁଷ ୨୦୦୪ ମସିହାରେ ବିବାହ ବନ୍ଧନରେ ବାନ୍ଧି ହୋଇଥିଲେ ।
