ନୂଆଦିଲ୍ଲୀ : ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନରେ ଆତଙ୍କ ସ୍ପଷ୍ଟି ହୋଇଛି। ଯୁଦ୍ଧ ଆଶଙ୍କାରେ ସବୁବେଳେ ବାଉଳି ହେଉଛି ପାକ । ପ୍ରତିଦିନ ଏହାର ନେତାମାନେ କିଛି ନା କିଛି ଦମ୍ଭ ଦେଖାଇବାରେ ଲାଗିଛନ୍ତି। ଭାରତ ପହଲଗାମରେ ଆତଙ୍କବାଦୀ ଆକ୍ରମଣ ପଛରେ ପାକିସ୍ତାନର ହାତ ଥିବା ଅଭିଯୋଗ କରୁଥିବା ବେଳେ ପାକିସ୍ତାନ ଏହାକୁ ମିଛ ବୋଲି କହୁଛି। ହେଲେ ଏହାରି ମଧ୍ୟରେ ପାକିସ୍ତାନର ନେତାମାନେ ମାନୁଛନ୍ତି ଯେ ତାଙ୍କ ଦେଶରେ ଆତଙ୍କବାଦୀ ସଂଗଠନକୁ ସହଯୋଗ ରହିଛି। ଆତଙ୍କବାଦୀଙ୍କୁ ପାଳିବା କୌଣସି ଗୁପ୍ତ କଥା ନୁହେଁ, ପାକିସ୍ତାନରେ ଆତଙ୍କବାଦୀଙ୍କ ଇତିହାସ ବହୁ ପୁରୁଣା ବୋଲି ନେତା କହୁଛନ୍ତି। ପ୍ରଥମେ ତାଙ୍କ ପ୍ରତିରକ୍ଷା ମନ୍ତ୍ରୀ ଏବଂ ଏବେ ପୂର୍ବତନ ବୈଦେଶିକ ମନ୍ତ୍ରୀ ସ୍ୱୀକାର କରିଛନ୍ତି ଯେ ପାକିସ୍ତାନ ଆତଙ୍କବାଦର ଏକ ଆଶ୍ରୟସ୍ଥଳ। ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ ନିଜେ ସ୍ୱୀକାର କରିଛନ୍ତି ଯେ ତାଙ୍କ ଦେଶର ଆତଙ୍କବାଦୀ ଗୋଷ୍ଠୀ ସହିତ ସମ୍ପର୍କ ରହିଛି। ସେ କହିଥିଲେ ଯେ ପାକିସ୍ତାନରେ ଆତଙ୍କବାଦୀଙ୍କ ଇତିହାସ ବହୁ ପୁରୁଣା। ଏହା କାହାଠାରୁ ଲୁଚି ନାହିଁ ଯେ ପାକିସ୍ତାନର ଆତଙ୍କବାଦୀଙ୍କ ସହ ସମ୍ପର୍କ ରହିଛି। ଆତଙ୍କବାଦୀ ଗୋଷ୍ଠୀଗୁଡ଼ିକୁ ସମର୍ଥନ ଏବଂ ପାଣ୍ଠି ଯୋଗାଇବାରେ ପାକିସ୍ତାନର ସମ୍ପୃକ୍ତିକୁ ତାଙ୍କ ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ସ୍ୱୀକାର କରିବା ପରେ ପୂର୍ବତନ ବୈଦେଶିକ ମନ୍ତ୍ରୀଙ୍କ ଏହି ସ୍ୱୀକାରୋକ୍ତି ଆସିଛି।
