ଜାମନଗର: ପୂର୍ବତନ କ୍ରିକେଟର ସଲିମ ଦୁରାନିଙ୍କ ନିଧନ । ୮୮ ବର୍ଷରେ ଭାରତୀୟ ଟିମର ପୂର୍ବତନ ସ୍ପିନ ଅଲରାଉଣ୍ଡର ଦୁରାନିଙ୍କ ପରଲୋକ ହୋଇଛି । ସେ କିଛି ଦିନ ଧରି ଦୁରାରୋଗ୍ୟ କ୍ୟାନସରରେ ପୀଡ଼ିତ ଥିଲେ । ଗୁଜରାଟ ଜାମନଗରରେ ତାଙ୍କର ପରଲୋକ ହୋଇଛି । ୧୯୬୦ ମସିହାରେ ଦୁରାନିଙ୍କୁ କ୍ରୀଡ଼ା ଜଗତର ସମ୍ମାନଜନକ ଅର୍ଜୁନ ପୁରସ୍କାରରେ ସମ୍ମାନିତ କରାଯାଇଥିଲା । ଟିମ୍ ଇଣ୍ଡିଆ ପାଇଁ ସେ ୨୯ଟି ଟେଷ୍ଟ ମ୍ୟାଚ ଖେଳିଛନ୍ତି । ଗୋଟିଏ ଶତକ, ୭ ଅର୍ଦ୍ଧଶତକ କରିବା ସହ ୭୫ଟି ଓ୍ୱିକେଟ ନେଇଥିଲେ ।
୧୯୩୪ ମସିହା ୧୧ ଡିସେମ୍ବରରେ ଆଫଗାନିସ୍ତାନର କାବୁଲରେ ଦୁରାନିଙ୍କ ଜନ୍ମ । ମାତ୍ର ୮ମାସ ହୋଇଥିବା ପରେ ପରିବାର ସହ ପାକିସ୍ତାନର କରାଚି ଚାଲିଆସିଥିଲେ ଦୁରାନି । ମାତ୍ର ବିଭାଜନ ବେଳେ ଦୁରାନିଙ୍କ ପରିବାର ଭାରତ ଚାଲିଆସିଥିଲେ । ୬୦-୭୦ଦଶକରେ ଭାରତୀୟ କ୍ରିକେଟରେ ଅଲରାଉଣ୍ଡର ଭାବେ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ ଦୁରାନି ।
