ବାରିପଦା: ଶୀତଋତୁରେ ଅଧିକ ଥଣ୍ଡା କାରଣରୁ ଜଳାଶୟ ଉପରେ ନିର୍ଭର କରୁଥିବା ବିଭିନ୍ନ ପ୍ରଜାତିର ପକ୍ଷୀମାନେ ଖାଦ୍ୟ ଅନ୍ୱେଷଣରେ ସୁଦୂର ସାଉବେରିଆ ଆଡୁ ହଜାର ହଜାର ମାଇଲ୍ ବାଟ ଅତିକ୍ରମ କରି ଉଡିଆସିଥାନ୍ତି ଏହି ମୟୁରଭଞ୍ଜ ଜିଲ୍ଲାକୁ । ଦେଶ ବିଦେଶରୁ ଉଡି ଆସୁଥିବା ଏହି ପକ୍ଷୀ ମାନଙ୍କ ସୁରକ୍ଷା ଓ ସେମାନେ କେଉଁ କେଉଁ ପ୍ରଜାତିର ଓ ସେମାନଙ୍କ ଗତିବିଧି କିଭଳି ତାକୁ ଜାଣିବା ପାଇଁ ମୟୁରଭଞ୍ଜ ଜିଲ୍ଲାରେ ପ୍ରତିବର୍ଷ ପକ୍ଷୀ ଗଣନା କାର୍ଯ୍ୟକ୍ରମ ଆୟୋଜନ କରାଯାଇଥାଏ । ସୂଚନା ଅନୁଯାୟୀ ପ୍ରତିବର୍ଷ ଭଳି ଏହି ବର୍ଷ ମଧ୍ୟ ମୟୂରଭଞ୍ଜ ଜିଲ୍ଲାର ବାରିପଦା, କରଞ୍ଜିଆ, ରାଇରଙ୍ଗପୁର ବନଖଣ୍ଡର ଦେଉଳିର ଜମ୍ଭିରା, ମଡଯୋଡ, ପାଉଁସିଆ, ହଳଦିଆ, କାଳ, ସୋନ, ନେସା, ବାଙ୍କବଳ ଓ ସୁଲେଇପାଟର ଖଡଖାଇ ବନ୍ଧ ସମେତ ୧୦୦ରୁ ଉର୍ଦ୍ଧ୍ୱ ଜଳାଶୟ ଏବଂ ଶିମିଳିପାଳ ଜୈବମଣ୍ଡଳ ମଧ୍ୟରେ ୫ତାରିଖ ସକାଳୁ ବିଭିନ୍ନ ପ୍ରଜାତିର ପକ୍ଷୀ ଚିହ୍ନଟ ଓ ଗଣନା ଆରମ୍ଭ ହୋଇଛି । ଏହି କାର୍ଯ୍ୟକ୍ରମରେ ୩ ବନଖଣ୍ଡ ଅଧିକାରୀ, ବନପାଳ, ରେଞ୍ଜ ଅଧିକାରୀ, ଗାର୍ଡ ଓ ଗବେଷକମାନେ ନିୟୋଜିତ ହୋଇଥିବା ସୂଚନା ମିଳିଛି ।
