ନୂଆଦିଲ୍ଲୀ : ବର୍ଷିୟାନ ଅଭିନେତ୍ରୀ ଓ୍ଵାହିଦା ରେହମାନଙ୍କୁ ଦାଦା ସାହେବ ଫାଲକେ ପୁରସ୍କାରରେ ସମ୍ମାନିତ କରାଯିବ। କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଏହି ଘୋଷଣା କରିଛନ୍ତି। ୮୫ ବର୍ଷୀୟା ବଲିଉଡ ଲିଜେଣ୍ଡ ୱାହିଦା ରେହମାନ ନିଜ ଅଭିନୟ ଜରିଆରେ ସିନେମା ଜଗତରେ ସ୍ୱତନ୍ତ୍ର ଛାପ ଛାଡିଛନ୍ତି। ଗାଇଡ, ପ୍ୟାସା, କାଗଜ କେ ଫୁଲ, ଚୌଦହବିଁ କା ଚାନ୍ଦ, ସାହେବ ବିବି ଔର ଗୋଲାମ, ଖାମୋସି ଆଦି ସୁପରହିଟ ଫିଲ୍ମରେ ଅଭିନୟ କରି ପ୍ରଶଂସା ସାଉଣ୍ଟିଛନ୍ତି। କେନ୍ଦ୍ରମନ୍ତ୍ରୀ ଅନୁରାଗ ଠାକୁର ‘ଏକ୍ସ’ରେ ପୋଷ୍ଟ୍ ସେୟାର କରି ଏ ବିଷୟରେ ସୂଚନା ଦେଇଛନ୍ତି। ଏଥିରେ ସେ ଲେଖିଛନ୍ତି, ‘ମୋତେ ଏହା ଘୋଷଣା କରି ବହୁତ ଖୁସି ଲାଗୁଛି ଯେ ଓ୍ଵାହିଦା ରେହମାନଙ୍କୁ ଭାରତୀୟ ସିନେମାରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ଚଳିତ ବର୍ଷ ପ୍ରତିଷ୍ଠିତ ଦାଦା ସାହେବ ଫାଲ୍କେ ଲାଇଫ୍ଟାଇମ ଆଚିଭ୍ମେଣ୍ଟ ଆଓ୍ଵାର୍ଡରେ ସମ୍ମାନିତ କରାଯାଉଛି’। କେନ୍ଦ୍ରମନ୍ତ୍ରୀ କହିଛନ୍ତି ଯେ ହିନ୍ଦୀ ଚଳଚ୍ଚିତ୍ର ଜଗତର ବର୍ଷିୟାନ ଅଭିନେତ୍ରୀ ଓ୍ଵାହିଦା ରେହମାନଙ୍କୁ ଚଳିତ ବର୍ଷର ଦାଦା ସାହେବ ଫାଲ୍କେ ଲାଇଫ୍ଟାଇମ ଅଚିଭ୍ମେଣ୍ଟ ପୁରସ୍କାର ପାଇଁ ମନୋନୀତ କରାଯାଇଛି।
