ମୟୂରଭଞ୍ଜ : ଗୁରୁବାର ଅପରାହ୍ନରେ ଆଭାସୀ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୟୂରଭଞ୍ଜ ଜିଲ୍ଲାର ନବନିର୍ମିତ ହଳଦିଆ ବନ୍ଧକୁ ଲୋକାର୍ପିତ କରିଛନ୍ତି। ଏଥିସହିତ ସୁବର୍ଣ୍ଣରେଖା ଜଳସେଚନ ପ୍ରକଳ୍ପର ଦ୍ଵିତୀୟ ପର୍ୟ୍ୟାୟ କାର୍ୟ୍ୟ ଯଥା ବ୍ୟାରେଜ ନିର୍ମାଣର ଭିଭିପ୍ରସ୍ତର ସ୍ଥାପନ କରିଛନ୍ତି । ଜଳ ସମ୍ପଦ ବିଭାଗ ଦ୍ବାରା ଆଭାସୀ ମାଧ୍ୟମରେ ଏହି ପ୍ରକଳ୍ପଗୁଡିକର ଉଦଘାଟନ ଓ ଶିଳାନ୍ୟାସ କାର୍ୟ୍ୟକ୍ରମ ସମ୍ପନ୍ନ ହୋଇଯାଇଛି । ମୟୂରଭଞ୍ଜ ଜିଲ୍ଲା କୁଳିଅଣା ବ୍ଳକ ଅନ୍ତର୍ଗତ ହଳଦିଆ ଗ୍ରାମରେ ନିର୍ମିତ ବନ୍ଧ ନିକଟରେ ଲୋକାର୍ପଣ ଓ ଶିଳାନ୍ୟାସ କାର୍ୟ୍ୟକ୍ରମ ପାଇଁ ଏକ ସାଧାରଣସଭା ଅନୁଷ୍ଠିତ ହୋଇଥିଲା । ସଭାରେ ପରିବହନ ଓ ଜଳ ସମ୍ପଦ ବିଭାଗ ମନ୍ତ୍ରୀ ଟୁକୁନି ସାହୁ, ବିଦ୍ୟାଳୟ ଓ ଗଣଶିକ୍ଷା ତଥା ରାଜସ୍ୱ ଓ ବିପର୍ୟ୍ୟୟ ପରିଚାଳନା ମନ୍ତ୍ରୀ ସୁଦାମ ମାରାଣ୍ଡି, ଜିଲ୍ଲାପାଳ ବିନୀତ ଭରଦ୍ବାଜ, ଚାଷୀ ସତ୍ୟଭାମା ନାଥ ଓ ଆନନ୍ଦ ଟୁଡୁ ସମେତ ଉପସ୍ଥିତ ରହି ମୁଖ୍ୟମନ୍ତ୍ରୀଙ୍କ ପରିକଳ୍ପନା ପାଇଁ ମୟୂରଭଞ୍ଜ ଓ ବାଲେଶ୍ଵର ଜିଲ୍ଲାର ଅଣଜଳସେଚିତ ଚାଷ ଜମି ଜଳସେଚନ ସୁବିଧା ମିଳିବାର ଉଦବୋଧନ ଦେଇଥିଲେ। ୩୨୨ କୋଟି ଟଙ୍କା ବ୍ୟୟରେ ସୁବର୍ଣ୍ଣରେଖା ଜଳସେଚନ ପ୍ରକଳ୍ପର ନିର୍ମିତ ବନ୍ଧ ଦ୍ବାରା ବାରିପଦା ଓ କୁଳିଅଣା ବ୍ଳକର ୪୦ଟି ଗ୍ରାମର ୭ ହଜାର ୫୯୦ ଜମିକୁ ପାଣି ସେଚିତ ହୋଇପାରିବା ହଳଦିଆ ବନ୍ଧକୁ ୧୯୧୦ ମସିହାରେ ତକ୍ରାଳୀନ ମୟୂରଭଞ୍ଜ ମହାରାଜା ଜଳସେଚନ ପାଇଁ ନିର୍ମାଣ କରିଥିଲେ । ସେତେବେଳେ ଜଳଧାରଣା କ୍ଷମତା ଥିଲା ୧୧୧୫ ଘନ ମିଟର । ଯାହାକି ଖରିଫ ଚାଷରେ ୨ହଜାର ୨୪୩ ହେକ୍ଟର ଜମିକୁ ଜଳସେଚିତ କରୁଥିବାବେଳେ ରବି ଚାଷ ବେଳେ ମାତ୍ର ୪୦୮ ହେକ୍ଟର ଜମି ଜଳସେଚିତ ହେଉଥିଲା ଓ ଜଳଧାରଣ କ୍ଷମତା କମ ଥିବାରୁ ବାରମ୍ବାର ସମ୍ପ୍ରସାରଣ ଓ ଜଳଧାରଣ କ୍ଷମତା ବୃଦ୍ଧି କରିବାକୁ ଦାବି ହୋଇ ଆସୁଥିଲା । ପ୍ରତୀକ୍ଷାର ଅନ୍ତ ଘଟାଇ ମୁଖ୍ୟମନ୍ତ୍ରୀ ଲୋକାର୍ପିତ କରିଛନ୍ତି । ଏଥିପାଇଁ ଜିଲ୍ଲାବାସୀ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି।
