ଭୁବନେଶ୍ୱର : ୨୦୨୩ ବର୍ଷର ସର୍ବାଧିକ ଚର୍ଚ୍ଚିତ ଓଡ଼ିଆ ଛବି ‘ପୁଷ୍କରା’କୁ ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ଭାବେ ରାଷ୍ଟ୍ରୀୟ ପୁରସ୍କାର ମିଳିବା ନିଶ୍ଚିତ ରୂପେ ଗର୍ବ ଓ ଗୌରବର ବିଷୟ। ତେବେ ଏହି ସିନେମା ସହିତ ଜଡ଼ିତ ଅନେକଙ୍କ ପାଇଁ ଏହା ପ୍ରଥମ ରାଷ୍ଟ୍ରୀୟ ପୁରସ୍କାର। ପ୍ରଥମତଃ ‘ପୁଷ୍କରା’ର ପ୍ରଯୋଜକ ତରଙ୍ଗ ସିନେ ପ୍ରଡକ୍ସନ୍ସ ଓ ରମେଶ ବାରିକଙ୍କ ପାଇଁ ଏହା ପ୍ରଥମ ଜାତୀୟ ପୁରସ୍କାର। ଠିକ୍ ସେହିପରି ଏହାର ନିର୍ଦ୍ଦେଶକ ଶୁଭ୍ରାଂଶୁ ଦାଶ ବି ନିଜ ନିର୍ଦ୍ଦେଶିତ ପ୍ରଥମ ଛବିକୁ ରାଷ୍ଟ୍ରୀୟ ପୁରସ୍କାରପ୍ରାପ୍ତ ଛବିର ମର୍ୟ୍ୟାଦା ଦେବାରେ ସଫଳ ହୋଇଛନ୍ତି। ‘ପୁଷ୍କରା’ର ନାୟକ ସବ୍ୟସାଚୀ ମିଶ୍ର, ନାୟିକା ସୁପ୍ରିୟା ମଧ୍ୟ କ୍ୟାରିଅର୍ରେ ପ୍ରଥମଥର ପାଇଁ ଏକ ରାଷ୍ଟ୍ରୀୟ ପୁରସ୍କାରପ୍ରାପ୍ତ ଓଡ଼ିଆ ଛବିରେ ଅଭିନୟ କରି ଗୌରବାନ୍ବିତ ମନେକରିବା ସ୍ବାଭାବିକ। ଆଉ ଏକ ଗୁରୁତ୍ବପୂର୍ଣ୍ଣ କଥାହେଲା ଯେ ମହିଳା ସିନେମାଟୋଗ୍ରାଫର ଫଲ୍ଗୁ ଶତପଥୀଙ୍କର ପ୍ରଥମ ସିନେମା ବି ହେଲା ‘ପୁଷ୍କରା’।
