ଚେନ୍ନାଇ :ମା’ ଗୋଟିଏ ଅକ୍ଷରର ଏହି ଶବ୍ଦରେ ରହିଛି ଅନେକ ସ୍ନେହ, ମମତା ଓ ଭଲପାଇବା । ମା’ର ସ୍ଥାନ ଜୀବନରେ ସବୁଠୁ ଉଚ୍ଚରେ। ମା’ ପ୍ରତି ଭଲପାଇବା କେବେ କମେନା। ମା’ ପାଖରେ ଥାଉ ବା ନଥାଉ ମା’ର ଆର୍ଶୀବାଦ କିନ୍ତୁ ପିଲା ଉପରେ ସବୁବେଳେ ରହିଥାଏ। ଚେନ୍ନାଇର ଅମରୁଦ୍ଦିନ ଶେଖ୍ ଦାଉଦ ସାହେବ ମଧ୍ୟ ଜୀବନର ପ୍ରତିଟି କ୍ଷେତ୍ରରେ ମା’ର ମୂଲ୍ୟକୁ ବୁଝିଛନ୍ତି। କାରଣ ସେ ଯାହା ବି ହୋଇଛନ୍ତି କେବଳ ତାଙ୍କ ମା’ ପାଇଁ। ଅମରୁଦ୍ଦିନ ଶେଖ୍ ଦାଉଦ ସାହେବ ଜଣେ ସଫଳ ହାର୍ଡୱେୟାର ବ୍ୟବସାୟୀ। ମା’ ଆଜି ତାଙ୍କ ପାଖରେ ନାହାନ୍ତି। କିନ୍ତୁ ମା’ ପ୍ରତି ଥିବା ତାଙ୍କ ନିଆରା ଭଲପାଇବା ପାଇଁ ସେ ମା’ଙ୍କ ସ୍ମୃତିରେ ଏକ ମିନି ତାଜମହଲ ନିର୍ମାଣ କରିଛନ୍ତି। ଏହି ମିନି ତାଜମହଲଟି ଅମରୁଦ୍ଦିନ ତାଙ୍କ ପୈତୃକ ଗାଁ ତାମିଲନାଡୁର ତିରୁବରୁରରେ ନିର୍ମାଣ କରିଛନ୍ତି। ସେ ଏଥିପାଇଁ ୫ କୋଟି ଟଙ୍କା ଖର୍ଚ୍ଚ କରିଛନ୍ତି। ୨୦୨୦ରେ ଜୈଲାନି ବିବି ଅମରୁଦ୍ଦିନ ଶେଖଙ୍କ ମାଙ୍କ ଦେହାନ୍ତ ହୋଇଗଲା। ଏହା ଅମରୁଦ୍ଦିନଙ୍କ ଜୀବନରେ ସବୁଠୁ ବଡ଼ ଝଟ୍କା ଥିଲା। ତାଙ୍କ ମା’ଙ୍କର ଅମାବାସ୍ୟାରେ ମୃତ୍ୟୁ ହୋଇଥିଲା। ତେଣୁ ପ୍ରତି ଅମାବାସ୍ୟାରେ ସେ ୧୦୦୦ ଲୋକଙ୍କୁ ବିରିୟାନି ଭୋଜି ଦିଅନ୍ତି। ଖାଲି ସେତିକି ନୁହେଁ ମା’ ପାଇଁ ସେ ତାଜମହଲ ନିର୍ମାଣ କରିଛନ୍ତି। ରାଜସ୍ଥାନରୁ ମାର୍ବଲ ମଗାଇ ତାମିଲନାଡ଼ୁର ପୈତୃକ ଗ୍ରାମରେ ସେ ୧ ଏକର ଜମି କିଣି ତାଜହମଲ ନିର୍ମାଣ କରିଛନ୍ତି।
