ନୂଆଦିଲ୍ଲୀ : ଆସନ୍ତା ୨୦୨୫ରେ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଆମ୍ ଆଦମୀ ପାର୍ଟି(ଆପ୍)ର ସଂଯୋଜକ ଅରବିନ୍ଦ କେଜ୍ରିୱାଲ ଏକ ବଡ଼ ଘୋଷଣା କରିଛନ୍ତି।କେଜ୍ରିୱାଲ ଗୁରୁବାର (ଡିସେମ୍ବର ୧୨) ରେ ‘ମହିଳା ସମ୍ମାନ ନିଧି ଯୋଜନା’ ଘୋଷଣା କରିଛନ୍ତି। ଏହି ଯୋଜନାକୁ ଗୁରୁବାର ପୂର୍ବାହ୍ନରେ ଦିଲ୍ଲୀ କ୍ୟାବିନେଟ ବୈଠକରେ ଅନୁମୋଦନ କରାଯାଇଛି। ଏହି ଯୋଜନାରେ ସରକାର ପ୍ରତି ମାସରେ ଏକ ହଜାର ଟଙ୍କା ଯୋଗ୍ୟ ମହିଳାଙ୍କ ଆକାଉଣ୍ଟକୁ ସ୍ଥାନାନ୍ତର କରିବେ। କେବଳ ଏତିକି ନୁହେଁ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି ଯେ, ନିର୍ବାଚନ ପରେ ମହିଳାମାନଙ୍କୁ ୧୦୦୦ ଟଙ୍କା ବଦଳରେ ୨୧୦୦ ଟଙ୍କା ଦିଆଯିବ। ଶୁକ୍ରବାର (୧୩ ଡିସେମ୍ବର)ରୁ ମହିଳାମାନେ ଏହି ଯୋଜନା ପାଇଁ ପଞ୍ଜିକରଣ କରିପାରିବେ।ଦିଲ୍ଲୀରେ ପ୍ରାୟ ୬୭ ଲକ୍ଷ ମହିଳା ଅଛନ୍ତି, ଯେଉଁମାନଙ୍କ ମଧ୍ୟରୁ ପ୍ରାୟ ୩୮ ଲକ୍ଷ ମହିଳା ଏହି ଯୋଜନା ପାଇଁ ଯୋଗ୍ୟ ହେବେ। ଏହି ସମସ୍ତ ମହିଳାଙ୍କୁ ମହିଳା ସମ୍ମାନ ନିଧି ପ୍ରଦାନ କରିବା ଦ୍ବାରା ଅର୍ଥ ବିଭାଗ ଉପରେ ୪୦୦୦ କୋଟିରୁ ଅଧିକ ଟଙ୍କାର ବୋଝ ପଡ଼ିବ।
