ରାଜ୍ୟ ସରକାର ୧୯୮୯ ବ୍ୟାଚ୍ର ଆଇଏଏସ୍ ଅଧିକାରୀ ତଥା ଉନ୍ନୟନ କମିଶନର ପ୍ରଦୀପ କୁମାର ଜେନାଙ୍କୁ ମୁଖ୍ୟ ଶାସନ ସଚିବ ଭାବେ ନିଯୁକ୍ତି ଦେଇଛନ୍ତି। ବର୍ତ୍ତମାନର ମୁଖ୍ୟ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କର ଫେବ୍ରୁଆରି ୨୮ତାରିଖରେ କାର୍ୟ୍ୟକାଳ ଶେଷ ହେଉଥିବାରୁ ଶ୍ରୀ ଜେନା ଏହାପରେ ଦାୟିତ୍ବ ଗ୍ରହଣ କରିବେ। ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ରବିବାର ଦିନ ଏସଂକ୍ରାନ୍ତରେ ବିଜ୍ଞପ୍ତି ପ୍ରକାଶ ପାଇଛି। ଶ୍ରୀ ଜେନା ରାଜ୍ୟର ୪୫ତମ ମୁଖ୍ୟ ଶାସନ ସଚିବ ଭାବେ ମାର୍ଚ୍ଚ ୧ ତାରିଖରେ ଦାୟିତ୍ବ ଗ୍ରହଣ କରିବେ।
ସେହିପରି ଜଳସମ୍ପଦ ବିଭାଗର ଅତିରିକ୍ତ ମୁଖ୍ୟ ସଚିବ ତଥା ୧୯୯୧ ବ୍ୟାଚ୍ର ଆଇଏଏସ୍ ଅଧିକାରୀ ଅନୁ ଗର୍ଗଙ୍କୁ ରାଜ୍ୟ ସରକାର ଉନ୍ନୟନ କମିସନର ଏବଂ ଯୋଜନା ଓ ସଂଯୋଜନା ବିଭାଗର ସଚିବ ଭାବେ ନିଯୁକ୍ତି ଦେଇଛନ୍ତି। ଶ୍ରୀମତୀ ଗର୍ଗ ମଧ୍ୟ ମାର୍ଚ୍ଚ ୧ରେ ନୂଆ ଦାୟିତ୍ବ ଗ୍ରହଣ କରିବେ।
ଏହାସହ ସେ ଜଳସମ୍ପଦ ବିଭାଗର ଅତିରିକ୍ତ ମୁଖ୍ୟ ସଚିବ ଭାବେ ମଧ୍ୟ କାର୍ୟ୍ୟ କରିବେ। ସୂଚନାଯୋଗ୍ୟ ଯେ ମୁଖ୍ୟ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କର କାର୍ୟ୍ୟକାଳ ଶେଷ ହେବା ପରେ ରାଜ୍ୟ ସରକାର ଦୁଇ ଥରରେ ୧ବର୍ଷ ପାଇଁ ତାଙ୍କର କାର୍ୟ୍ୟକାଳ ବୃଦ୍ଧି କରିଥିଲେ। ଯାହା ଫେବ୍ରୁଆରି ୨୮ରେ ଶେଷ ହେବ। ଅପରପକ୍ଷେ ପ୍ରଦୀପ ଜେନା ମୁଖ୍ୟ ସଚିବ ହେବା ପରେ କୃଷି ଉତ୍ପାଦନ କମିସନର, ସ୍ବତନ୍ତ୍ର ରିଲିଫ କମିସନର, ଓସ୍ଡମାର ପରିଚାଳନା ନିର୍ଦ୍ଦେଶକ ପଦବି ଖାଲି ପଡ଼ିବ। ଏହା ସହ ମୁଖ୍ୟ ସଚିବ ପ୍ରଶାସନିକ ସ୍ତରରେ କିଛି ଅଦଳ ବଦଳ କରିପାରନ୍ତି। ତେଣୁ ଖୁବ୍ ଶୀଘ୍ର ଆଇଏଏସ୍ ଅଧିକାରୀ ସ୍ତରରେ ଅଦଳବଦଳ ହେବ ବୋଲି ଚର୍ଚ୍ଚା ହେଉଛି।
ବ୍ୟୁରୋ ରିପୋର୍ଟ ଶପଥ ନ୍ୟୁଜ୍ ।
