ଯାଜପୁର : ଏ କିପରିକା ବ୍ୟବସ୍ଥା । ଜୀବିତ ବ୍ୟକ୍ତିଙ୍କୁ କରିଦେଉଛନ୍ତି ମୃତ । ବ୍ଲକ କମ୍ପ୍ୟୁଟର ରେକର୍ଡରେ ଜୀବିତ ବ୍ୟକ୍ତି ହୋଇଛନ୍ତି ମୃତ । ଏଭଳି ଘଟଣା ଘଟିଛି ଦାନଗଦି ବ୍ଲକ ମଙ୍ଗଳପୁର ପଞ୍ଚାୟତ ଖରଡି ଗାଁରେ । ଖରଡି ଗାଁର ହରି ଦାସଙ୍କ ପୁଅ ଦୁର୍ଯେ୍ୟାଧନ ଦାସ ଜୀବିତ ଥିବା ବେଳେ ରେକର୍ଡରେ କିନ୍ତୁ ନାଁ ମୃତ ରହିଛି ।
ଦୁର୍ଯେ୍ୟାଧନ ଅଭାବ ଅନଟନରେ ଚଳୁଥିବା ବେଳେ ପ୍ରଧାନମନ୍ତ୍ରୀ ଆବାସ ଯୋଜନାରେ ତାଙ୍କ ନାଁ ସାମିଲ ହୋଇଥିବା ଜାଣି ଟିକେ ଆଶ୍ୱସ୍ତ ହୋଇଥିଲେ । ଦୁର୍ଭାଗ୍ୟର କଥା ତାଙ୍କ ସହ ଆବାସ ଯୋଜନାରେ ନାଁ ଥିବା ଅନ୍ୟ ଲୋକଙ୍କର ବ୍ୟାଙ୍କ ପାସବହିକୁ ଘର କରିବା ପାଇଁ ଟଙ୍କା ଆସିଲା କିନ୍ତୁ ଦୁର୍ଯେ୍ୟାଧନ ଙ୍କର ଆସିଲା ନାହିଁ । ଏ ନେଇ ସେ ବ୍ଲକ ଅଫିସରେ ପଚାରିବାରୁ କମ୍ପୁଟର ଦେଖାଇ କହିଲେ ତମ ନାଁ ମୃତ ତାଲିକା ରେ ଆସୁଛି । ତେଣୁ ଟଙ୍କା ଯିବ କିପରି ? ତାପରେ ନିରାଶ ହୋଇ ଦୁର୍ଯେ୍ୟାଧନ ସରପଞ୍ଚଙ୍କୁ କହିବାରୁ ତାଙ୍କ ପରାମର୍ଶ କ୍ରମେ ବି. ଡି. ଓ ଙ୍କୁ ଲିଖିତ ଅଭିଯୋଗ କରିଛନ୍ତି । ବି. ଡି. ଓ ଏହାର ବ୍ୟବସ୍ଥା କରିବେ ବୋଲି ପ୍ରତିଶୃତି ଦେଇଛନ୍ତି । ସର୍ଭେ ସମୟରେ ଯେଉଁ ବାବୁ/ବାବୁଆଣୀ ଦୁର୍ଯେ୍ୟାଧନଙ୍କୁ ମୃତ ରିପୋର୍ଟ ଦେଲେ ସେ ଏ ନେଇ କୌଣସି ରାଜନୈତିକ ଉଦେଶ୍ୟ ରଖି କରି ନାହାଁନ୍ତି ତ? ଅଭିଯୋଗ ହେଉଛି ଗରିବ ଲୋକ ଲାଞ୍ଚ ନ ଦେଲେ ରାଗରେ ଅଫିସର ମାନେ ଏପରି ମଧ୍ୟ କରନ୍ତି? ସେ ଯାହାବି ହେଉ ଏ ଗରିବ ହିତାଧିକାରୀ ଦୁର୍ଯେ୍ୟାଧନଙ୍କୁ ସଠିକ ତଦନ୍ତ କରି ନ୍ୟାୟ ପ୍ରଦାନ କରିବାକୁ ଗ୍ରାମବାସୀ ମାନେ ଦାବୀ କରିଛନ୍ତି ।
