ନୟାଗଡ : ୧୦୦ରୁ ଅଧିକ ଲୋକ ଏବେ ଜଣ୍ଡିସ ରୋଗରେ ଆକ୍ରାନ୍ତ । ପିଲାଠୁ ବୁଢା ସମସ୍ତେ ଆକ୍ରାନ୍ତ । ହସ୍ପିଟାଲ ଗଲେ ବି ଭଲ ହେଉନି । ଏ ନେଇ ଭୟଭୀତ ହୋଇପଡିଛନ୍ତି ସ୍ଥାନୀୟ ଲୋକେ । ନୟାଗଡ ଜିଲ୍ଲା ସୀମାନ୍ତ ପଞ୍ଚାୟତ ଚାନ୍ଦପୁର ଓ ଜେମାଦେଇପୁର ଗାଁରେ ବ୍ୟାପିଲାଣି ଜଣ୍ଡିସ ରୋଗ । ଲୋକମାନେ ସଚେତନ ହେବା ପାଇଁ ବିଭିନ୍ନ ପ୍ରକାରର ସଚେତନତା ନାରା ଦେଇ ବୁଲୁଛି ପ୍ରଚାର ଗାଡି । ଗାଁ ମଝିରେ ପିଲା ଠାରୁ ବୁଢ଼ା ଜଣଙ୍କ ପରେ ଜଣଙ୍କର ଚାଲିଛି ପରୀକ୍ଷା ନିରୀକ୍ଷା । ଏହା ସହ ସ୍ବାସ୍ଥ୍ୟ ବିଭାଗ ତରଫରୁ ରକ୍ତ ଓ ଜଳ ନମୁନା ସଂଗ୍ରହ କାର୍ୟ୍ୟ ମଧ୍ୟ ଚାଲିଛି । ବହୁଦିନ ଧରି ଏହି ଜଣ୍ଡିସରେ ପ୍ରାୟ ୧୦୦ ରୁ ଉର୍ଦ୍ଧ୍ବ ଶିଶୁ ମହିଳା ଓ ପୁରୁଷ ଆକ୍ରାନ୍ତ ହୋଇ ବିଭିନ୍ନ ସ୍ଥାନରେ ଚିକିତ୍ସିତ ହେଉଛନ୍ତି । ପାନୀୟ ଜଳରୁ ଏହି ଜଣ୍ଡିସ ରୋଗ ବ୍ୟାପୁଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏହି ଜଣ୍ଡିସ ରୋଗରେ ଆକ୍ରାନ୍ତ ହୋଇ ଜଣେ ମହିଳାଙ୍କ ଜୀବନ ଚାଲି ଯାଇଛି । ମୃତ ମହିଳାଙ୍କ ନାମ ପୁଷ୍ପା ସାହୁ ବୟସ ୩୦ । ସେ ଚାନ୍ଦପୁର ଗାଁର ବୋଲି ଜଣାପଡ଼ିଛି । ସେ ବିବାହିତ ଓ ତାଙ୍କର ଗୋଟିଏ ଛୋଟ ପୁଅ ଥିବା ଜଣା ପଡିଛି ।
