ନୂଆଦିଲ୍ଲୀ :କମୁଛି ସୁନା ଓ ରୂପା ଦର । ଧନତେରସ ଏବଂ ଦୀପାବଳିରେ ସୁନା ଦର ବଢ଼ିଥିବା ବେଳେ ଅଳ୍ପ କେତେ ବ୍ୟବଧାନରେ ପୁଣି ହ୍ରାସ ପାଇଛି । ମଲ୍ଟି କମୋଡିଟି ଏକ୍ସଚେଞ୍ଜ (ଏମ୍ସିଏକ୍ସ)ର ସୂଚନା ଅନୁଯାୟୀ, ସୁନା ଏବଂ ରୂପା ମୂଲ୍ୟ ସେମାନଙ୍କର ସର୍ବକାଳୀନ ସର୍ବୋଚ୍ଚ ମୂଲ୍ୟଠାରୁ ପ୍ରାୟ ୯ରୁ ୧୬ ପ୍ରତିଶତ ହ୍ରାସ ପାଇଛି । ଏମ୍ସିଏରେ ସୁନାର ମୂଲ୍ୟ ସର୍ବକାଳୀନ ସର୍ବୋଚ୍ଚ ମୂଲ୍ୟ ୧୦ ଗ୍ରାମ୍ ପିଛା ୧ଲକ୍ଷ ୩୨ହଜାର ୨୯୪ରୁ ୧୧ହଜାର ୭୭୯ ଟଙ୍କା ହ୍ରାସ ପାଇ ୧ ଲକ୍ଷ ୨୦ହଜାର ୫୧୫କୁ ଆସିଛି । ଯାହାକି ପ୍ରାୟ ୮.୯୦ ପ୍ରତିଶତ ହ୍ରାସ ହୋଇଛି । ସେହିପରି ରୁପା ମୂଲ୍ୟ ୧ଲକ୍ଷ ୭୦ହଜାର ୪୧୫ କିଲୋଗ୍ରାମରୁ ୨୬ହଜାର ୫୯୫ ଟଙ୍କା ହ୍ରାସ ପାଇ ୧ଲକ୍ଷ ୪୩ ହଜାର ୮୧୯ ଟଙ୍କାକୁ ଖସିଛି । ଏହାର ଅର୍ଥ ହେଉଛି ରୁପାରେ ୧୫.୬୦ ପ୍ରତିଶତ ହ୍ରାସ ଘଟିଛି । ବିଶ୍ୱ ବଜାରରେ ମଧ୍ୟ ସୁନା ଏବଂ ରୁପାର ମୂଲ୍ୟ ଯଥାକ୍ରମେ ପ୍ରାୟ ୮.୬୦ ପ୍ରତିଶତ ଏବଂ ୧୨.୬୦ ପ୍ରତିଶତ ହ୍ରାସ ପାଇଛି । ଦୁଇ ଦିନର ହ୍ରାସ ପରେ ସୁନା ଏବଂ ରୁପା ମୂଲ୍ୟ ସାମାନ୍ୟ ବୃଦ୍ଧି ପାଇଛି । ଭାରତ-ଆମେରିକା ବାଣିଜ୍ୟ ଚୁକ୍ତିର ଆଶା ସୁନା ଏବଂ ରୁପାକୁ କିଛି ସମର୍ଥନ ଯୋଗାଇଛି । ଦୁଇ ଦେଶ ମଧ୍ୟରେ ଶୀଘ୍ର ଏକ ବାଣିଜ୍ୟ ଚୁକ୍ତି ସ୍ୱାକ୍ଷରିତ ହେବାର ରିପୋର୍ଟ ମଧ୍ୟରେ ଗୁରୁବାର ସକାଳେ ଏମ୍ସିଏକ୍ସରେ ସୁନା ମୂଲ୍ୟ ସାମାନ୍ୟ ବୃଦ୍ଧି ପାଇଛି । ସୁନା ଓ ରୂପା ଦର ଆଗକୁ ଆହୁରି ହ୍ରାସ ପାଇବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି ।
