ଗୁରୁବାର ମଧ୍ୟରାତ୍ରିରୁ ମୁକ୍ତିଲାଭ କରୁଛି ବହୁ ପ୍ରତୀକ୍ଷିତ କନ୍ନଡ଼ ଆକ୍ସନ୍ ଫିଲ୍ମ ‘କେଜିଏଫ୍-୨’ । ୨୦୧୮ରେ ମୁକ୍ତିପ୍ରାପ୍ତ ‘କେଜିଏଫ୍’ର ଏହା ସିକ୍ୱେଲ୍ । ଏହାର ଲିଡ୍ରେ ଅଛନ୍ତି ୟଶ୍, ସଞ୍ଜୟ ଦତ୍ତ, ଶ୍ରୀନିଧି ସେଟ୍ଟୀ, ରବିନା ଟଣ୍ଡନ, ପ୍ରକାଶ ରାଜ । ସିନେମାଟି ବିଶ୍ୱସ୍ତରରେ ୧୦ହଜାର ସ୍କ୍ରିନ୍ରେ ମୁକ୍ତିଲାଭ କରୁଥିବାବେଳେ ଓଡ଼ିଶାରେ ୭୦ଟି ସିଙ୍ଗିଲ୍ ଏବଂ ମଲ୍ଟି ସ୍କ୍ରିନ୍ରେ ଚାଲିବ । ଭୁବନେଶ୍ୱରରେ ସିନେମାଟି ମହାରାଜା ସିନେମା ହଲ୍ରେ ୨୪ ଘଣ୍ଟା ଚାଲିବ ।
ସିନେ ଇତିହାସରେ ପ୍ରଥମ ଥର ପାଇଁ ରାତି ୨ଟା ୫୦ରେ ଶୋ’ ଆରମ୍ଭ ହେବ । ଏଥିପାଇଁ ବି ଟିକଟ ମିଳୁନାହିଁ ବୋଲି ମହାରାଜା ହଲ୍ ମ୍ୟାନେଜର ଲିଙ୍ଗରାଜ ପଣ୍ଡା କହିଛନ୍ତି । ଏହି ଶୋ’କୁ ମିଶାଇ ହଲ୍ ପକ୍ଷରୁ ୭ଟା ଶୋ’ ହେବ । ଏହାଛଡ଼ା ସିନେ ପୋଲିସ୍ରେ ୨୨ଟି, ଆଇନକ୍ସ ଭବାନୀ ମଲରେ ୧୪, ରିଗାଲିଆରେ ୧୬, ସିମ୍ଫୋନୀରେ ୧୩, କେଶରୀ ଟକିଜ୍ରେ ୬, ସ୍ତୁତି ଓ ସ୍ୱାତୀରେ ୧୦ଟି ଶୋ’ ପଡ଼ିଛି । ଯେହେତୁ ସିନେମାଟି କନ୍ନଡ଼ ସମେତ ତେଲୁଗୁ, ହିନ୍ଦୀ, ତାମିଲ ଏବଂ ମାଲାୟଲମ୍ ଭାଷାରେ ହେଉଛି ତେଣୁ ବିଭିନ୍ନ ଭାଷାଭାଷୀ ଲୋକଙ୍କ ଲାଗି ସ୍ୱତନ୍ତ୍ର ଶୋ’ ହେଉଛି । ସିନେମା ଆସିବା ପୂର୍ବରୁ ଉତ୍ସାହିତ କେଜିଏଫ୍ ଫ୍ୟାନ୍ ପୂରା ସେଲିବ୍ରେସନ୍କୁ ଅପେକ୍ଷା କରିଥିଲାବେଳେ ଶୋ’ ରିଲିଜ୍କୁ ଅପେକ୍ଷା କରିଛନ୍ତି ।
