ଭୁବନେଶ୍ୱର: ରାଜଧାନୀସ୍ଥିତ ଭରତପୁର ଅଞ୍ଚଳରେ ହୋଇଥିବା ସୁରେଖା ପଲେଇଙ୍କ ମୃତ୍ୟୁ ମାମଲାର ଖୁଲାସା ହୋଇଛି । ଏହି ମାମଲାରେ ସମ୍ପୃକ୍ତ ତାଙ୍କ ପ୍ରେମିକଙ୍କ ସମେତ ୩ ଜଣକୁ କମିଶନରେଟ୍ ପୋଲିସ୍ ଗିରଫ କରିଛି । ପ୍ରେମିକଙ୍କ ସହ ଝଗଡ଼ା ହେବା ପରେ ଯୁବତି ଜଣକ ଆତ୍ମହତ୍ୟା କରିଥିବା ଜଣା ପଡ଼ିଛି । ତେବେ ସୁରେଖା ଆତ୍ମହତ୍ୟା କଲା ପରେ ମାଡ଼ ଭୟରେ ପ୍ରେମିକ ଜଣକ ଫେରାର ହୋଇଯାଇଥିଲା ବୋଲି ପୋଲିସକୁ କହିଛି ।
ସୂଚନାନୁଯାୟୀ, ଗତ ୯ ତାରିଖ ରାତିରେ ଭୋଜି କରୁଥିବା ବେଳେ ସୁରେଖା ଓ ତାଙ୍କ ପ୍ରେମିକ କୌଣସି କାରଣରୁ ଝଗଡ଼ା ଲାଗିଥିଲେ । ଏହା ପରେ ସୁରେଖା ଏକ କୋଠରି ଭିତରକୁ ଯାଇ ଭିତର ପଟୁ ବନ୍ଦ କରିଦେଇଥିଲେ । ସେହି ବନ୍ଦ କୋଠରୀରେ ସୁରେଖା ବେକରେ ରସି ଲଗାଇ ଆତ୍ମହତ୍ୟା କରିଥିଲେ । ସୁରେଖାଙ୍କର ମୃତ୍ୟୁ ହୋଇଯାଇଥିବା ଦେଖି ପୋଲିସ ଭୟରେ ସୁରେଖାଙ୍କ ପ୍ରେମିକ ଓ ତାଙ୍କ ସାଙ୍ଗମାନେ ମିସି ମୃତ ଦେହକୁ ନେଇ ତାଙ୍କ ଘରେ ରଖିଦେଇ ଘଟଣା ସ୍ଥଳରୁ ଫେରାର ହୋଇଯାଇଥିଲେ । ପର ଦିନ ସକାଳୁ ଏ ନେଇ ପୋଲିସ ଖବର ପାଇ ଘଟଣା ସ୍ଥଳରେ ପହଞ୍ଚିଥିଲା । ପୋଲିସ ମୃତ ଦେହକୁ ଜବତ କରି ପୋଷ୍ଟମଟମ ପାଇଁ ପଠାଇଥିଲା । ଏହା ସହ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଥିଲା । ତେବେ ଏହି ମାମଲାର ଅଧିକ ତଦନ୍ତ ଜାରିରଖିଥିଲା କମିସନରେଟ ପୋଲିସ୍ । ଏଥିରେ ଗିରଫ ହୋଇଥିବା ୩ ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରାଯିବ ।
