ଭୁବନେଶ୍ୱର: ସମସ୍ତଙ୍କର ମନରେ ସୁଖ ସମୃଦ୍ଧିର ବାତାବରଣ ନେଇ ନୂଆ ବର୍ଷ ଆସିଥିବା ବେଳେ, ଅପରାଧୀଙ୍କ ପେଣ୍ଠସ୍ଥଳୀ ରାଜଧାନୀରେ ପୁଣି ଦେଖିବାକୁ ମିଳିଛି ଦୁଇ ଦୁଇଟି ଜଘନ୍ୟ ହତ୍ୟା କାଣ୍ଡ । ଗତକାଲି ବିଳମ୍ବିତ ରାତିରେ ଏୟାରଫିଲ୍ଡ ଥାନା ଅଧିନସ୍ଥ ସୁନ୍ଦରପଦା ନୂଆସାହିରେ ଘଟିଛି ଏକ ନିର୍ମମ ହତ୍ୟା କାଣ୍ଡ । ମୃତକଙ୍କ ନାମ ଦିପୁ ରାଉତବୋଲି ଜଣା ପଡ଼ିଛି ।
ସୂଚନାନୁଯାୟୀ, ଗତ କାଲି ଦିପୁ ନୁଆସାହିର କିଛି ଯୁବକଙ୍କ ସହ ମିଶି ନୂଆ ବର୍ଷ ଉପଲକ୍ଷେ ଭୋଜି କରିଥିଲେ । କପିଳେଶ୍ୱର ଅଞ୍ଚଳର କିଛି ଯୁବକ ସେଠାକୁ ଆସି ନିଶାସକ୍ତ ଅବସ୍ଥାରେ ସେମାନଙ୍କୁ ଗାଳିଗୁଲଜ କରିଥିଲେ । ପରେ ସେମାନେ ପଳାଇଯାଇଥିଲେ । ହେଲେ କିଛି ସମୟ ପରେ ସେମାନେ ଅଚାନକ ଆସି ଖଣ୍ଡାରେ ଆକ୍ରମଣ କରିଥିଲେ । ସେହି ଦୁର୍ବୃତ୍ତଙ୍କ ଆକ୍ରମଣରେ ଦିପୁ ଟଳିପଡ଼ିଥିଲେ ଘଟରା ସ୍ଥଳରେ । ଏନେଇ ଖବର ପାଇବା ପରେ ଏୟାରଫିଲ୍ଡ ପୋଲିସ୍ ଘଟଣା ସ୍ଥଳରେ ପହଞ୍ଚି ମୃତ ଦେହକୁ ଜବତ କରିବା ସହ ତଦନ୍ତ ଆରମ୍ଭ କରିଛି ।
ସେପଟେ ମଞ୍ଚେଶ୍ୱର ଚକେଇଶିଆଣିର ଗାଙ୍ଗୁଆ ନାଳରୁ ଜଣେ ଯୁବକଙ୍କ ମୃତ ଦେହ ଉଦ୍ଧାର କରାଯାଇଛି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ, ମୃତକଙ୍କ ପରିଚୟ ମିଳିପାରିନାହିଁ । ସେହି ନାଳରୁ ମୃତକଙ୍କର ସ୍କୁଟି ମଧ୍ୟ ମିଳିଥିବା ସୂଚନା ରହିଛି । ଖବର ପାଇ ପୋଲିସ ଓ ଅଗ୍ନଶମ ବାହିନୀ ଘଟଣା ସ୍ଥଳରେ ପହଞ୍ଚି ମୃତ ଦେହକୁ ଉଦ୍ଧାର କରି ଘଟଣାର ତଦନ୍ତ ଜାରି ରଖିଛି ।
