ଭୁବନେଶ୍ୱର: ପୌର ନିର୍ବାଚନ ପାଇଁ ହେଲା ନିସ୍ପତ୍ତି । ଆସନ୍ତା ମାର୍ଚ୍ଚ ୨୪ ରେ ମତଦାନ ଓ ୨୬ ରେ ଗଣତି କରାଯିବାକୁ ନିସ୍ପତ୍ତି ହୋଇଛି । ଏ ନେଇ ରାଜ୍ୟ ନିର୍ବାଚନ କମିଶନ ସୂଚନା ଦେଇଛନ୍ତି । ତେବେ ଏହି ପୌର ନିର୍ବାଚନ ପାଇଁ ଫେବୃଆରୀ ୨୮ ରେ ବିଜ୍ଞପ୍ତି ପ୍ରକାଶ ପାଇବା ସହିତ ମାର୍ଚ୍ଚ ୨ ରୁ ୭ ପର୍ଯ୍ୟନ୍ତ ପ୍ରାର୍ଥୀପତ୍ର ଦାଖଲ କରାଯିବ ।
ସେହିପରି ମାର୍ଚ୍ଚ ୯ ତାରିଖରେ ନାମାଙ୍କନ ପତ୍ର ଯାଞ୍ଚ, ୧୪ ସୁଦ୍ଧା ପ୍ରତ୍ୟାହାର କରାଯିବ । ତେବେ ୧୦୬ ମ୍ୟୁନିସିପାଲିଟିରେ ହେବ ନିର୍ବାଚନ, ୩ଟି ମହାନଗରରେ କରାଯିବ ନିର୍ବାଚନ । ଅଦାଲତି କାରଣ ପାଇଁ ପୁରୀ ମ୍ୟୁନିସିପାଲିଟିାର ନିର୍ବାଚନ କରାଯିବ ନାହିଁ । ନିସ୍ପତ୍ତି ଅନୁଯାୟୀ ଏଥର ମେୟର ବା ପୌରାଧ୍ୟକ୍ଷ ନିର୍ବାଚନ ସିଧା ସଳଖ କରାଯିବ । ଇଭିଏମ୍ରେ ହେବ ଭୋଟ୍ ଗ୍ରହଣ, ପ୍ରତି ବୁଥ୍ରେ ରହିବ ୨ଟି ଇଭିଏମ୍ । ଗୋଟିଏ ଇଭିଏମ୍ରେ ମେୟର/ପୌରାଧ୍ୟକ୍ଷଙ୍କୁ ଭୋଟ ଦେଇ ହେବ । ୨ୟ ଇଭିଏମ୍ରେ କାଉନସିଲର/କର୍ପୋରେଟରଙ୍କୁ ଭୋଟ ଦେଇ ହେବ । ପ୍ରଥମ ଥର ପାଇଁ ପୌର ନିର୍ବାଚନରେ ରହିବ ନୋଟା ବିକଳ୍ପ । ଏପ୍ରିଲ ୭ରେ ପୌର ଉପାଧ୍ୟକ୍ଷ, ୮ରେ ଡେପୁଟି ମେୟର ନିର୍ବାଚନ ।
