ସାଲେପୁର : ଯୌତୁକ ଜୁଇରେ ଜଳିଲେ ନବବଧୂ । କରିଥିଲେ ପ୍ରେମ ବିବାହ । କିନ୍ତୁ ଯୌତୁକ ଆଣି ନ ଥିବାରୁ ଶାଶୁଘର ଲୋକ କରୁଥିଲେ ଟାହିଟାପରା । ଝିଅକୁ ମାନସିକ ଓ ଶାରିରୀକ ନିର୍ୟ୍ୟାତନା ଦେଇ ଆସୁଥିଲେ ଶାଶୁଘର ଲୋକେ । ଏବେ ମୋ ଝିଅକୁ ଜୀବନରୁ ଶେଷ କରିଦେଲେ । ଏଭଳି ଏକ ସାଙ୍ଘାତିକ ଅଭିଯୋଗ ଆଣିଛନ୍ତି ମୃତକ ଝିଅର ବାପା ମା । କଟକ ଜିଲ୍ଲା ନେମାଳ ଥାନା ଅଧିନସ୍ଥ ନେମାଳ ପଞ୍ଚାୟତ ମାଳିଗାଁ ଗାଁର ପ୍ରେମାନନ୍ଦ ସାହୁଙ୍କ ଝିଅ ସ୍ଥିତିପ୍ରଜ୍ଞା ସାହୁଙ୍କୁ ଶାନ୍ତପୁର ପଞ୍ଚାୟତ ମାଣିକପୁର ଗାଁର ଗଣେଶ୍ୱର ନାଥଙ୍କ ପୁଅ ଶ୍ରୀନିବାସ ନାଥ ପ୍ରେମ ବିବାହ କରିଥିଲେ । ଉଭୟ ପ୍ରେମ ବିବାହ କରିବା ପରେ ଯୌତୁକକୁ ନେଇ ପାରିବାରିକ କଳହ ଲାଗି ରହୁଥିଲା । ଏ ବାବଦରେ ଝିଅ ସ୍ଥିତି ପ୍ରଜ୍ଞା ତାଙ୍କ ମା’ଙ୍କୁ ଫୋନ୍ କରି ସବୁ ଜଣାଇଥିଲେ । କିନ୍ତୁ ଗତ କାଲି ରାତିରେ ସ୍ଥିତି ପ୍ରଜ୍ଞାଙ୍କୁ ମାରିଦେଇଥିବା ଅଭିଯୋଗ ଆଣିଛନ୍ତି ଝିଅର ବାପା ମା’ । ଏନେଇ ଥାନାରେ ଏତଲା ମଧ୍ୟ ଦେଇଛନ୍ତି । ପୋଲିସକୁ ଘଟଣା ବାବଦରେ ପଚାରିବାରୁ କୌଣସି ପ୍ରତିକ୍ରିୟା ଦେଇନଥିବା ବେଳେ ଅଭିଯୁକ୍ତ ସ୍ୱାମୀ ଶ୍ରୀ ନିବାସ ନାଥଙ୍କୁ ଗିରଫ କରି କୋର୍ଟ ଚାଲାଣ କରିଛି ନେମାଳ ପୋଲିସ । ସମସ୍ତ ଅଭିଯୁକ୍ତମାନଙ୍କ ବିରୁଦ୍ଧରେ ଦୃଢ କାର୍ୟ୍ୟାନୁଷ୍ଠାନ ଦାବି କରିଛନ୍ତି ମୃତକଙ୍କ ବାପ ଘର ଲୋକେ ।
