କିଭ୍: ରୁଷ ଓ ୟୁକ୍ରେନ୍ ମଧ୍ୟରେ ଲାଗିଥିବା ଘମାଘୋଟ ଯୁଦ୍ଧରେ ପୁଣି ଜଣେ ଭାରତୀୟ ଛାତ୍ରଙ୍କୁ ଲାଗିଲା ଗୁଳି । ୟୁକ୍ରେନରେ ଥିବା ଭାରତୀୟମାନଙ୍କୁ ଉଦ୍ଧାର କାର୍ଯ୍ୟ ଚାଲିଥିବା ବେଳେ, ଛାତ୍ର ଜଣକ ଭାରତ ଫେରୁଥିବା ସମୟରେ ତାଙ୍କ ଦେହରେ ଗୁଳି ବାଜିଥିବା ଜଣାପଡ଼ିଛି । ଆହତ ଛାତ୍ରଙ୍କୁ ଉଦ୍ଧାର କରି ଚିକିତ୍ସା ପାଇଁ କିଭର ଏକ ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନାନୁଯାୟୀ, ରୁଷର ଆକ୍ରମଣରେ ଏଯାବତ ୟୁକ୍ରେନର ୧୦ରୁ ଅଧିକ ସହର କ୍ଷତିଗ୍ରସ୍ତ ହୋଇଥିବା ସହ ଏହି ଯୁଦ୍ଧରେ ୧୫୦୦ରୁ ଅଧିକ ୟୁକ୍ରେନୀୟ ଆହତ ହୋଇଛନ୍ତି । ଏନେଇ ପୋଲାଣ୍ଡରେ ଉପସ୍ଥିତ ଥିବା କେନ୍ଦ୍ର ରାଜ୍ୟମନ୍ତ୍ରୀ ଭି.କେ. ସିଂ କହିଛନ୍ତି ଯେ, ଗୁଳି ବାଜିଥିବା ଛାତ୍ରଙ୍କୁ ଉଦ୍ଧାର କରି କିଭ୍ ଫେରାଇ ଆଣିବା ସହ ଚାକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଆହତ ଛାତ୍ରଙ୍କ ଅପରିଚୟ ମିଳି ପାରିନାହିଁ । ଅଧିକରୁ ଅଧିକ ଭାରତୀୟ ଛାତ୍ରଙ୍କୁ ଦେଶକୁ ଫେରାଇ ଆଣିବାକୁ ଚେଷ୍ଟା ଜାରି ରହିଛି ।
