ଯାଜପୁର : ଧର୍ମଶାଳାରେ ଆତଙ୍କ ଖେଳାଇଲା ଜଙ୍ଗଲୀ ହାତୀ । ଗାଁ , ବଜାର ସବୁଠି ବୁଲିଲା । ଏଭଳି ଦୃଶ୍ୟ ଆଜି ଦେଖିବାକୁ ମିଳିଥିଲା ଯାଜପୁର ଜିଲ୍ଲା ଧର୍ମଶାଳା ଓ ଜାରକା ବଜାର ଅଞ୍ଚଳରେ । ଗତକାଲି ରାତିରେ ହାତୀଟି ଯାଜପୁର ଟାଉନ ଅଞ୍ଚଳରେ ବୁଲୁଥିବା ଲୋକେ ଦେଖିବାକୁ ପାଇଥିବା ବେଳେ ଆଜି ସକାଳୁ କୁଆଖିଆ ଅଞ୍ଚଳ ଦେଇ ବ୍ରାହ୍ମଣୀ ନଦୀ ପାର ହୋଇ ଧର୍ମଶାଳା ଅଞ୍ଚଳକୁ ପଶି ଆସିଥିଲା । ବଣୁଆ ହାତୀକୁ ଦେଖିବା ପାଇଁ ହଜାର ହଜାର ଲୋକ ରୁଣ୍ଡ ହୋଇଥିଲେ । କିଛି ସମୟ ପାଇଁ ହାତୀଟି ୧୬ନଂ ଜାତୀୟ ରାଜପଥ ଉପରକୁ ଚାଲି ଆସିବାରୁ ଯାନବାହନ ଚଳାଚଳ ବନ୍ଦ ରହିଥିଲା । ଏହି ସମୟରେ ହାତୀଟି କେତୋଟି ବାଇକକୁ ଭଙ୍ଗାରୁଜା କରିଥିବା ଦେଖିବାକୁ ମିଳିଥିଲା ।ଲୋକଙ୍କ ଭିଡ଼ ସହ ହାତୀକୁ ଘଉଡ଼ାଇବାକୁ ବନ ବିଭାଗ କର୍ମଚାରୀ ଓ ପୋଲିସକୁ ନାକେଦମ ହେବାକୁ ପଡ଼ିଥିଲା । ଫଳରେ ବାଧ୍ୟ ହୋଇ ମାଇକ ପ୍ରଚାର କରି ଲୋକଙ୍କୁ ସତର୍କ କରାଇଥିଲା ।କେଉଁଝର ପଟୁ ହାତୀଟି ଚାଲି ଆସିଥିବା ବେଳେ ତାକୁ ଘଉଡାଇବା ପାଇଁ ସମସ୍ତ ପ୍ରକାର ଉଦ୍ୟମ ଜାରି ରହିଥିବା କହିଛନ୍ତି ବୈରୀ ବନ ବିଭାଗ ରେଞ୍ଜର।
