ନୂଆଦିଲ୍ଲୀ : ବେକାବୁ କାର୍ଲିଫର୍ଣ୍ଣିଆ ଜଙ୍ଗଲ ନିଆଁ । ମୃତ୍ୟୁ ସଂଖ୍ୟା ୨୪ ଛୁଇଁଲାଣି , ଅନେକ ନିଖୋଜ । ଲସ ଏଞ୍ଜେଲସରେ ଲାଗିଥିବା ନିଆଁ ବ୍ୟାପୁଥିବାରୁ ଭୟଙ୍କର ସ୍ଥିତି ଉପୁଜିଛି । ଥମିବା ବଦଳରେ ନୂଆ ଅଞ୍ଚଳକୁ ଗ୍ରାସୁଛି ଜଙ୍ଗଲ ନିଆଁ । ୧୨ ହଜାରରୁ ଅଧିକ ଘର ଜଳି ଗଲାଣି । ଏଠାରେ ପ୍ରାୟ ୧୦୦୦ ଏକର ଯାଏଁ ନିଆଁ ବ୍ୟାପିଛି, ଯେଉଁଥିରେ ହଜାର ହଜାର ଘର ଜଳି ପୋଡି ପାଉଁଶ ହୋଇଯାଇଛି । ନିଆଁ ଯୋଗୁଁ ୩୩୫ ସ୍କୁଲ ବନ୍ଦ କରିଦିଆଯାଇଛି । ସରକାରୀ ଏଜେନ୍ସୀ ନିଆଁକୁ ଆୟତ୍ତ କରିବା ପାଇଁ ବିସ୍ଥାପିତଙ୍କୁ ସାହାଯ୍ୟ କରୁଛି । ବହୁ ବନ୍ୟଜନ୍ତୁ ଜଙ୍ଗଲ ନିଆଁରେ ଜଳି ଗଲେଣି । ପ୍ରାୟ ୨ଲକ୍ଷ ଲୋକ ଘରଦ୍ବାର ଛାଡ଼ି ପଳାଇଛନ୍ତି । ଅନେକ ହଲିଉଡ୍ ତାରକା ଘର ଛାଡ଼ିଛନ୍ତି। ତେବେ ଜଙ୍ଗଲ ନିଆଁକୁ ଇନ୍ଧନ ଦେଉଛି ସାଉଥ ଅନ୍ ୱିଣ୍ଡ । ଏହି ପବନ ନିଆଁକୁ ବ୍ୟାପିବାରେ ସହାୟତା କରୁଛି । ଦକ୍ଷିଣ ଲସ୍ ଏଞ୍ଜେଲସ୍ ର ଶୁଷ୍କ ଅଞ୍ଚଳରୁ ଆସୁଥିବା ଏହି ପବନ ନିଆଁକୁ ଅଧିକ ଭୟଙ୍କର କରିଛି । ନିଆଁକୁ ଆୟତ୍ତ କରିବା ପାଇଁ ଯଥେଷ୍ଟ ପାଣି ନାହିଁ । ଆକାଶ ମାର୍ଗରୁ ହେଲିକପ୍ଟର ଯୋଗେ ପାଣି ବର୍ଷା କରାଯାଉଛି । ନିଆଁ ଲିଭାଇବା ପାଇଁ ସରକାର ଲାଗି ପଡିଛନ୍ତି । ତଥାପି ନିଆଁ ଆୟତ୍ତ ହେଉନାହିଁ। ନିଆଁକୁ ନିୟନ୍ତ୍ରଣ କରିବା ସରକାରଙ୍କ ପାଇଁ ଚ୍ୟାଲେଞ୍ଜ ପାଲଟିଛି ।
