ଭୁବନେଶ୍ୱର : ଆଜି ଓଡିଶା ଆସିବେ ନବନିଯୁକ୍ତ ରାଜ୍ୟପାଳ ଡ. ହରିବାବୁ କମ୍ଭମପତି । ଅପରାହ୍ନରେ ଭୁବନେଶ୍ୱର ବିମାନବନ୍ଦରରେ ପହଁଚିବେ । ସେଠାରେ ତାଙ୍କୁ ଗାର୍ଡ ଅଫ ଅନର ପ୍ରଦାନ କରାଯିବ । ଏହା ପରେ ରାଜଭବନ ଯାଇ ସେଠାରୁ ପୁରୀ ଅଭିମୁଖେ ଯିବେ । ପୁରୀ ରାଜଭବନରେ ରାତ୍ରୀ ଯାପନ କରିବେ ନବ ନିଯୁକ୍ତ ରାଜ୍ୟପାଳ ହରିବାବୁ । କାଲି ସକାଳେ ଶ୍ରୀମନ୍ଦିରରେ ଶ୍ରୀଜିଉଙ୍କ ଦର୍ଶନ କରିବେ । ସେଠାରୁ ଭୁବନେଶ୍ୱର ଫେରିବେ । ତା ପରେ ସକାଳ ୧୦ଟା ୧୫ରେ ଓଡିଶାର ରାଜ୍ୟପାଳ ଭାବେ ଶପଥ ନେବେ । ନୂଆ ରାଜ୍ୟପାଳଘ୍କ ଶପଥ କାର୍ଯ୍ୟକ୍ରମ ପାଇଁ ରାଜଭବନ ଅଭିଷେକ ହଲରେ ବ୍ୟାପକ ପ୍ରସ୍ତୁତି କରାଯାଇଛି । ହାଇକୋର୍ଟର ମୁଖ୍ୟ ବିଚାରପତି ରାଜ୍ୟପାଳଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇବେ ।
ଛାତ୍ର ଜୀବନରେ ରାଜନୀତି ପ୍ରତି ଆଗ୍ରହ ରଖିଥିବା ହରିବାବୁ ୧୯୭୨ରେ ରାଜନୀତିରେ ସାମିଲ ହେଲେ । ୧୯୭୭ ମସିହାରେ ଆନ୍ଧ୍ରପ୍ରଦେଶ ଜନତା ପାର୍ଟିର ରାଜ୍ୟ କାର୍ଯ୍ୟକାରିଣୀ ସଦସ୍ୟ ଭାବେ କାର୍ଯ୍ୟ କରୁଥିଲେ । ଏହା ପରେ ୧୯୯୧ ମସିହାରୁ ୧୯୯୩ ମସିହା ପର୍ୟ୍ୟନ୍ତ ସେ ବିଜେପି ରାଜ୍ୟ କାର୍ୟ୍ୟକାରିଣୀ ସଦସ୍ୟ ଥିଲେ ।୧୯୯୯ ମସିହାରେ ସେ ବିଶାଖାପାଟଣା ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ। ୨୦୧୪ ମସିହାରେ ବିଶାଖାପାଟଣା ଲୋକସଭା ଆସନରୁ ସାଂସଦ ଭାବେ ନିର୍ବାଚିତ ହୋଇଥିଲେ। ଏହାସହିତ ୨୦୧୪ରୁ ୨୦୧୮ ମସିହା ପର୍ୟ୍ୟନ୍ତ ରାଜ୍ୟ ବିଜେପି ସଭାପତି ଦାୟିତ୍ୱରେ ଥିଲେ। ୨୦୨୧ ମସିହା ଜୁଲାଇ ୬ ତାରିଖରେ ତାଙ୍କୁ ମିଜୋରମ ରାଜ୍ୟପାଳ ଭାବେ ରାଷ୍ଟ୍ରପତି ନିଯୁକ୍ତି ଦେଇଥିଲେ। ଆନ୍ଧ୍ରପ୍ରଦେଶର ପ୍ରକାଶମ ଜିଲ୍ଲାରେ ଜନ୍ମିତ କେ ହରିବାବୁ ଆନ୍ଧ୍ର ବିଶ୍ୱବିଦ୍ୟାଳୟରୁ ବି. ଟେକ୍ ଡିଗ୍ରୀ ସହ ପିଏଚଡି ହାସଲ କରିଛନ୍ତି।ଗତ ୨୪ ତାରିଖରେ ସେ ଓଡ଼ିଶାର ରାଜ୍ୟପାଳ ଭାବେ ନିଯୁକ୍ତ ହୋଇଛନ୍ତି ।
