ନୂଆଦିଲ୍ଲୀ : ଚୀନ ଗସ୍ତରେ ରୁଷିଆ ରାଷ୍ଟ୍ରପତି ଭ୍ଲାଦମିର ପୁଟିନ । ସ୍ୱତନ୍ତ୍ର ବିମାନ ଯୋଗେ ବେଜିଂରେ ପହଁଚିଲେ ପୁଟିନ୍ । ୟୁକ୍ରେନ ଯୁଦ୍ଧ ଆରମ୍ଭ ପରେ ପ୍ରଥମ କରି ଏକ ପ୍ରମୁଖ ରାଷ୍ଟ୍ର ଗସ୍ତ କରିଛନ୍ତି ପୁଟିନ । ବେଲ୍ଟ ଆଣ୍ଡ ରୋଡ୍ ଇନିସିଏଟିଭ (ବିଆରଆଇ) ଫୋରମରେ ଯୋଗଦେବେ । ଏହା ୨ ଦିନ ଧରି ଚାଲିବ । ଚଳିତ ସପ୍ତାହରେ ମୋଟ ୧୩୦ ଦେଶର ପ୍ରତିନିଧି ଚୀନ ଗସ୍ତ କରିବେ । ଗତ ଫେବ୍ରୁଆରୀ ୨୦୨୨ରେ ଉଭୟ ନେତା ସୀମାହୀନ ସମ୍ପର୍କ ନେଇ ଦ୍ବିପାକ୍ଷିକ ଘୋଷଣା କରିଥିବାବେଳେ ବେଜିଂ ସମ୍ମିଳନୀରେ ଏହାର ସକାରାତ୍ମକ ପ୍ରଭାବ ପରିଲକ୍ଷିତ ହେବ । ମଧ୍ୟପ୍ରାଚ୍ୟରେ ଚୀନର ବିଭିନ୍ନ ସ୍ବାର୍ଥ ଥିବାରୁ ଦୁଇ ନେତାଙ୍କ ମଧ୍ୟରେ ଏନେଇ ଆଲୋଚନା ହେବାର ସମ୍ଭାବନା ରହିଛି ।
ୟୁକ୍ରେନ ଯୁଦ୍ଧକୁ ନେଇ ଋଷ ବିରୋଧରେ ଆମେରିକା ଜାରି କରିଥିବା କଟକଣା ପ୍ରସଙ୍ଗ ବି ଦୁଇ ନେତାଙ୍କ ମଧ୍ୟରେ ହେବାକୁ ଥିବା ଆଲୋଚନାରେ ସ୍ଥାନ ପାଇବ । ଇସ୍ରାଏଲ-ପାଲେଷ୍ଟାଇନ ଯୁଦ୍ଧରେ ଇସ୍ରାଏଲକୁ ଆମେରିକାର ଖୋଲାଖୋଲି ସମର୍ଥନକୁ ସହଜରେ ଗ୍ରହଣ କରୁନାହାନ୍ତି ଋଷ ଓ ଚୀନ । ସେପଟେ ଇସ୍ରାଏଲ ସହ ନିଜର ଅର୍ଥନୈତିକ ଓ କୂଟନୈତିକ ଭାରସାମ୍ୟ ରଖିବା ଲାଗି ଚୀନ ଉଦ୍ୟମ କରୁଛି ।
