ଜଳେଶ୍ୱର: ରାଜ୍ୟରେ ଦିନକୁ ଦିନ ବଢ଼ିଚାଲିଛି ଧଳାଜହର କାରବାର । ତେବେ ବାଲେଶ୍ୱର ଜିଲ୍ଲା ଜଳେଶ୍ୱର ଅଞ୍ଚଳରୁ ୫ କୋଟି ଟଙ୍କାର ବ୍ରାଉନସୁଗାର ଜବତ କରିବା ସହ ଏଥିରେ ସମ୍ପୃକ୍ତ ଥିବା ୬ ଜଣକୁ ଗିରଫ କରାଯାଇଛି । ପୂର୍ବରୁ ଏହି ଅଞ୍ଚଳରୁ ବହୁବାର ବାର ଲକ୍ଷାଧିକ ଟଙ୍କାର ବ୍ରାଉନସୁଗାର ଜବତ କରିବା ସହ ବେପାରୀଙ୍କୁ ମଧ୍ୟ ପୋଲିସ୍ ଗିରଫ କରିଛି । ତେବେ ମଧ୍ୟ ଏହି ବ୍ୟବସାୟୀ ଚାଲୁ ରହିଛି ।
ସୂୁଚନାନୁଯାୟୀ, ଦୀର୍ଘଦିନ ଧରି ଜଳେଶ୍ୱର ଅଞ୍ଚଳରେ ଏହି ବ୍ରାଉନସୁଗାର ବ୍ୟବସାୟ ଚାଲିଥିବା ନେଇ ପୋଲିସ୍ ପାଖରେ ଗୁଇନ୍ଦା ସୂଚନା ଥିଲା । ତେଣୁ ସେହି ବ୍ୟବସାୟୀମାନଙ୍କୁ ଧରିବା ପାଇଁ ପୋଲିସ୍ ଲଗାତାର ଭାବେ ଚେଷ୍ଟା କରି ଆସୁଥିଲା । ତେବେ ଗତ କାଲି ପଶ୍ଚିମବଙ୍ଗରୁ ବ୍ରାଉନ୍ସୁଗାର ନେଇ ଆସୁଥିବା ବେଳେ, ଡୁମ୍ଡୁମ୍ ନିକଟରେ ପୋଲିସ୍ ହାତରେ ଧରାପଡ଼ିଥିଲେ ଏହି ବେପାରିମାନେ । ପୋଲିସ୍ ୫ କେଜି ବ୍ରାଉନସୁଗାର ସହ ଏକ ସ୍କର୍ପିଓ ଗାଡ଼ି ମଧ୍ୟ ଜବତ କରିଛି । ଗିରଫ ୬ ଜଣ ଜଳେଶ୍ୱର ଅଞ୍ଚଳର ବୋଲି ସୂଚନା ମିଳିଛି । ପୋଲିସ୍ ସେମାନଙ୍କୁ ଅଟକ ରଖି ଅଧିକ ପଚରା ଉଚୁରା କରୁଛି ।
