ଦିଲ୍ଲୀର ଜାହାଙ୍ଗୀରପୁରୀରେ ହନୁମାନ ଜୟନ୍ତୀରେ ହିଂସାକାଣ୍ଡ । ହନୁମାନ ଜୟନ୍ତୀ ଅବସରରେ ଶୋଭାଯାତ୍ରା ଉପରେ ପଥର ମାଡ଼କୁ ନେଇ ଜାହାଙ୍ଗୀରପୁରୀ ଅଞ୍ଚଳରେ ଉତ୍ତେଜନା ବଢିବା ସହ ଦୁଇ ଗୋଷ୍ଠୀ ମଧ୍ୟରେ ପ୍ରବଳ ସଂଘର୍ଷ ହୋଇଥିଲା । ଏହି ହିଂସାକାଣ୍ଡରେ ୬ଜଣ ପୋଲିସକର୍ମୀ ସମେତ ଶୋଭାଯାତ୍ରାରେ ସାମିଲ ଏକାଧିକ ଶ୍ରଦ୍ଧାଳୁ ଆହତ ହୋଇଥିବା ଜଣାପଡ଼ିଛି । ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ହିଂସାକାଣ୍ଡ ପରେ ଦିଲ୍ଲୀର ବିଭିନ୍ନ ସମ୍ବେଦନଶୀଳ ଜାଗାରେ ପୋଲିସ୍ ମୁତୟନ କରାଯାଇଛି ।
ବିଶେଷକରି ହିଂସାକାଣ୍ଡ ଘଟିଥିବା ଦିଲ୍ଲୀର ସେଂଟ୍ରାଲ ଡିଷ୍ଟ୍ରିକ୍ ଓ ନର୍ଥ ଇଷ୍ଟ ଡିଷ୍ଟ୍ରିକ୍ଟରେ ଅଧିକ ସଂଖ୍ୟାରେ ପୋଲିସ୍ ଫୋର୍ସ ମୁତୟନ କରାଯାଇଛି । ସେପଟେ ପୋଲିସ୍ ଘଟଣାର ତଦନ୍ତ ମଧ୍ୟ ଆରମ୍ଭ କରିଦେଇଛି । ଆଖପାଖ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ୍ ଓ ସୋସିଆଲ ମିଡିଆରେ ଭାଇରାଲ୍ ହେଉଥିବା ଭିଡିଓକୁ ଆଧାର କରି ପୋଲିସ୍ କିଛି ସନ୍ଦିଗ୍ଧକୁ ଚିହ୍ନଟ କରିଥିବା ଜଣାପଡ଼ିଛି । ପାଖାପାଖି ୧୦ରୁ ଅଧିକ ଲୋକଙ୍କୁ ଅଟକ ରଖି ପଚରାଉଚରା ପଚରାଉଚରା କରୁଛି ପୋଲିସ । ଘଟଣାର ପୂରା ତଦନ୍ତ ପାଇଁ ୧୦ ଟିମ୍ ଗଠନ କରାଯାଇଛି । ହିଂସାକାଣ୍ଡକୁ ନେଇ ପୂରା ଦିଲ୍ଲୀରେ ଆଲର୍ଟ ଜାରି କରିଛି ପୋଲିସ । ବର୍ତମାନ ସ୍ଥିତି ନିୟନ୍ତ୍ରଣରେ ଅଛି । ଘଟଣାକୁ ଗୁରୁତର ସହ ନେଇଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ଗୃହମନ୍ତ୍ରୀ ଅମିତ ଶାହ ଏନେଇ ଦିଲ୍ଲୀ କମିସନରଙ୍କ ସହ ଆଲୋଚନା କରିଛନ୍ତି । ସେପଟେ ଦିଲ୍ଲୀ ଉପରାଜ୍ୟପାଳ ଅନୀଲ ବୈଜଲ ଓ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏଭଳି ହିଂସାକାଣ୍ଡକୁ ତୀବ୍ର ନିନ୍ଦା କରିଛନ୍ତି । କେଜ୍ରିୱାଲ ଲୋକଙ୍କୁ ଶାନ୍ତି ବଜାୟ ରଖିବା ପାଇଁ ନିବେଦନ କରିଛନ୍ତି
