ଭୁବନେଶ୍ୱର : ଜଣାଶୁଣା ଡିଜେ ଆଜେକ୍ସଙ୍କ ରହସ୍ୟ ଜନକ ମୃତ୍ୟୁ ଘଟଣା । ଆସିଲା ଆଜେକ୍ସଙ୍କ ଶବ ବ୍ୟବଚ୍ଛେଦ ରିପୋର୍ଟ । ଶ୍ୱାସରୁଦ୍ଧରୁ ମୃତ୍ୟୁ ହୋଇଥିବା ରିପୋର୍ଟରେ ଉଲ୍ଲେଖ । ଆଜେକ୍ସଙ୍କ ବେକରେ ଦାଗ ଥିବା ମଧ୍ୟ ଉଲ୍ଲେଖ ।
ଗତ ୧୭ ତାରିଖ ରାତିରେ ଯୁବତୀଙ୍କ ଠାରୁ ଚାପୁଡା ଖାଇବା ପରେ ରାତି ପାଖା ପାଖି ସାଢେ ୩ଟାରେ ଆଜେକ୍ସ ଘରକୁ ଫେରିଥିଲେ । ଘଟଣାଟି ତାଙ୍କ ହୃଦୟକୁ ଶକ୍ତ ଆଘାତ ଦେଇଥିଲା । ଏ ବିଷୟରେ ସେ କାହାକୁ କିଛି କହି ପାରି ନ ଥିଲେ । ଦିନ ତମାମ ଚିନ୍ତାରେ ଥିଲେ । ଘରେ ବି କାହା ସହ ଠିକରେ କଥା ହୋଇ ନ ଥିଲେ । ସନ୍ଧ୍ୟାରେ ନିଜ ରୁମ ଭିତରେ ଥିବା ତିନି ବୁଦ୍ଧ ମୂର୍ତ୍ତିଙ୍କ ମୁହଁକୁ ପଛକୁ ବୁଲାଇ ଦେଇଥିଲେ । ଘଣ୍ଟାରୁ ବ୍ୟାଟେରୀ କାଢି ଦେଇଥିଲେ । ତାଙ୍କର ରୁମରେ ଏଭଳି କିଛି ଦୃଶ୍ୟ ଆଜେକ୍ସଙ୍କ ଚରମ ନିଷ୍ପତ୍ତିର ସଂକେତ ଥିଲା ।
ଆଜେକ୍ସ ଜଣେ ଭଲ ରିମିକ୍ସର ଥିଲେ । ନିଜ ଘରେ ଆଲବମ ଗୁଡିକୁ ମକ୍ଟଳର କରି ୟୁଟ୍ୟୁବରେ ଅପଲୋଡ କରୁଥିଲେ । ଅନ୍ୟମାନେ ତାଙ୍କ ରିମିକ୍ସକୁ ଅପଲୋଡ କରି ପ୍ରଶଂସା ନେଉଥିଲେ । ହେଲେ ଆଉ ଶୁଭିବନି ଆଜେକ୍ସଙ୍କ ଡିଜେ । ଘରେ ଥିବା ତାଙ୍କ ଡିଜେ, କନସୋଲ ବି ଫିକା ପଡିଯାଇଛି । ସବୁ ଏପଟସେପଟ ହୋଇପଡିଛି ।
