ନୂଆଦିଲ୍ଲୀ : ରାଇସ୍ ମିଲରେ ଭୟଙ୍କର ଅଗ୍ନିକାଣ୍ଡ । ଛତିଶଗଡ଼ର ଦୁର୍ଗ ଜିଲ୍ଲାର ଚନ୍ଦକୁରୀ ଗାଁରେ ଥିବା ରାକେଶ ରାଇସ୍ ମିଲରେ ଭୟଙ୍କର ଅଗ୍ନିକାଣ୍ଡ ଘଟିଛି। ଗତକାଲି ବିଳମ୍ବିତ ରାତିରେ ଏହି ଅଗ୍ନିକାଣ୍ଡ ଘଟିଥିବା ସୂଚନା ରହିଛି । ଏହି ଅଗ୍ନିକାଣ୍ଡରେ ଲକ୍ଷ ଲକ୍ଷ ଟଙ୍କା ମୂଲ୍ୟର ଧାନ ଓ ଅଖାବସ୍ତା ଜଳି ପାଉଁଶ ହୋଇଯାଇଛି।
ରାଇସ୍ ମିଲରେ ନିଆଁ ଏତେ ଦ୍ରୁତ ଗତିରେ ବ୍ୟାପିଥିଲା ଯେ ଦେଖୁ ଦେଖୁ ପୂରା ରାଇସ୍ ମିଲ୍ ନିଆଁ କବଳକୁ ଚାଲିଆସିଥିଲା। ପାଖାପାଖି ୪ରୁ ୫ ଘଣ୍ଟା କଠିନ ପରିଶ୍ରମ ପରେ ୧୫ଟି ଅଗ୍ନିଶମ ବାହିନୀ ଗାଡି ନିଆଁକୁ ଆୟତ୍ତ କରିଥିଲେ। ମିଳିଥିବା ସୂଚନା ଅନୁସାରେ, ରବିବାର ରାତି ପ୍ରାୟ ୧୦ଟା ବେଳେ ରାକେଶ ରାଇସ୍ ମିଲରେ ଏକ ବଡ଼ ଧରଣର ଅଗ୍ନିକାଣ୍ଡ ଘଟିଥିବା ନେଇ ପୋଲିସକୁ ସୂଚନା ମିଳିଥିଲା। ଏହାପରେ ପୋଲିସ ଅଗ୍ନିଶମ ବିଭାଗକୁ ଖବର ଦେଇଥିଲା। ରାତି ପ୍ରାୟ ୧୧ଟା ସୁଦ୍ଧା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ, ହେଲେ ସେତେବେଳକୁ ନିଆଁ ଭୟଙ୍କର ରୂପ ଧାରଣ କରିଥିଲା। ତେବେ ରାଇସ୍ ମିଲରେ କିପରି ନିଆଁ ଲାଗିଲା, ତାହା ଏ ପର୍ୟ୍ୟନ୍ତ ସ୍ପଷ୍ଟ ହୋଇନାହିଁ। ସର୍ଟ ସର୍କିଟ ଯୋଗୁ ନିଆଁ ଲାଗିଥିବା ଆଶଙ୍କା କରାଯାଉଛି।
