ବ୍ରିଟେନର ମହାରାଣୀ ଏଲିଜାବେଥ୍ ଦ୍ୱିତୀୟଙ୍କ ୯୬ ବର୍ଷ ବୟସରେ ପରଲୋକ । ବ୍ରିଟେନ ରାଜଗାଦିରେ ସବୁଠୁ ଅଧିକ ଦିନ ଧରି ଶାସନ କରିଥିବା ମାହାରାଣୀ ଏଲିଜାବେଥ୍ ଦ୍ୱିତୀୟଙ୍କ ସ୍କଟଲ୍ୟାଣ୍ଡର ବାଲମୋରାଲ କ୍ୟାସେଲରେ ପରଲୋକ ହୋଇଛି । ଏନେଇ ବକିଙ୍ଗହମ୍ ପ୍ୟାଲେସ ପକ୍ଷରୁ ଏହି ଦୁଃଖଦ ସୂଚନା ଦିଆଯାଇଛି । ୯୬ ବର୍ଷୀୟା ମହାରାଣୀ ଗତ ବର୍ଷ ଅକ୍ଟୋବର ମାସରୁ ଅସୁସ୍ଥ ରହି ଆସୁଥିଲେ। ଚାଲିବା ଏବଂ ଠିଆ ହେବାରେ ତାଙ୍କର ସମସ୍ୟା ଦେଖା ହେଉଥିଲା। ହେଲେ ଆଜି ସେ ହଠାତ ଗୁରୁତର ଅସୁସ୍ଥ ହୋଇ ପଡିଥିଲେ। ଏପରିକି ଡାକ୍ତରୀ ଟିମ ତାଙ୍କ ସ୍ୱାସ୍ଥ୍ୟକୁ ନେଇ ଚିନ୍ତିତ ଥିଲେ।
ମହାରାଣୀଙ୍କ ବିୟୋଗ ପରେ ରାଜ ପରିବାର ବାଲମୋରାଲରେ ପହଞ୍ଚିଛନ୍ତି। ରାଣୀଙ୍କ ପୁଅ ହ୍ୟାରୀ ପ୍ରିନ୍ସ ଚାର୍ଲ୍ସ, ଅଣନାତି ଉଇଲିୟମ ଓ ହ୍ୟାରୀ ଏବଂ ତାଙ୍କ ପରିବାର ଏଠାରେ ପହଞ୍ଚିଛନ୍ତି। ଜୁନ ମାସରେ ରାଜ ପରିବାର ରାଣୀଙ୍କ ଶାସନର ୭୦ ବର୍ଷ ପୂର୍ତ୍ତିକୁ ବଡ଼ ଆଡମ୍ୱର ସହ ପାଳନ କରିଥିଲେ।
୨୦୧୫ରେ ବ୍ରିଟେନ ରାଜଗାଦିରେ ସର୍ବାଧିକ ସମୟ ଶାସନ କରିବାର ରେକର୍ଡ ନିଜ ନାଁରେ କରିଥିଲେ। ରାଣୀ ଭିକ୍ଟୋରିଆଙ୍କୁ ପଛରେ ପକାଇ ସେ ଏହି ଉପଲବ୍ଧି ହାସଲ କରିଥିଲେ।
ଏଲିଜାବେଥ୍ ଦ୍ୱିତୀୟଙ୍କ ବିୟୋଗରେ ସାରା ବ୍ରିଟେନର ଶୋକର ଛାୟା ଖେଳିଯାଇଛି। ମହାରାଣୀଙ୍କ ବିୟୋଗ ପରେ ତାଙ୍କ ପୁଅ ଚାର୍ଲ୍ସ ବ୍ରିଟେନର ରାଜା ହୋଇଛନ୍ତି । ଏନେଇ ରାଜ ପରିବାର ପକ୍ଷରୁ ଘୋଷଣା କରାଯାଇଛି।
ମହାରାଣୀ ଏଲିଜାବେଥ୍ ଦ୍ୱିତୀୟଙ୍କ ବିୟୋଗରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକ ବ୍ୟକ୍ତ କରିଛନ୍ତି। ପିଏମ ମୋଦୀ ଟ୍ୱିଟ କରି କହିଛନ୍ତି, ‘୨୦୧୫ ଏବଂ ୨୦୧୮ରେ ବ୍ରିଟେନ ଗସ୍ତ ସମୟରେ ରାଣୀ ଏଲିଜାବେଥ୍ ଦ୍ୱିତୀୟଙ୍କ ସହ ସ୍ମରଣୀୟ ବୈଠକ ହୋଇଥିଲା। ଗସ୍ତ ବେଳେ ଏକ ବୈଠକରେ ମହାତ୍ମା ଗାନ୍ଧୀ ତାଙ୍କୁ ଉପହାର ଦେଇଥିବା ଏକ ରୁମାଲ ସେ ମୋତେ ଦେଖାଇଥିଲେ। ଏହା ମୋ ପାଇଁ ସବୁବେଳେ ସ୍ମରଣୀୟ ହୋଇ ରହିବ।’
