ନୂଆଦିଲ୍ଲୀ : ରାଜସ୍ଥାନର ହନୁମାନଗଡରେ ଭାରତୀୟ ବାୟୁସେନା ବିମାନ ମିଗ୍-୨୧ ଦୁର୍ଘଟଣାଗ୍ରସ୍ତ ହେବା କାରଣରୁ ୩ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ରହିଛନ୍ତି । ଏହି ଘଟଣାରେ ମୃତକଙ୍କ ପରିବାରୁ ୫ ଲକ୍ଷ ଟଙ୍କାର କ୍ଷତିପୂରଣ ଦେବାକୁ ଘୋଷଣା କରାଯାଇଛି । ସୁରତଗଡରୁ ଉଡାଣ ଭରିଥିଲା ବିମାନ । ବିମାନ ଏକ ଘର ଉପରେ କ୍ରାସ ହୋଇ ପଡିଥିବାରୁ ଗ୍ରାମବାସୀ ମୃତ୍ୟୁବରଣ କରିଥିଲେ । କିନ୍ତୁ ପାଇଲଟ ପାରାସୁଟ୍ ସାହାଯ୍ୟରେ ନିଜକୁ ବଞ୍ଚାଇବାରେ ସକ୍ଷମ ହୋଇଥିଲେ ।
ଘଟଣାପରେ ପାଇଲଟଙ୍କୁ ଏୟାରଲିଫ୍ଟ କରାଯାଇଥିଲା । ପାଇଲଟଙ୍କ ପାଇଁ ବାୟୁସେନାର ଏମଆଇ ୧୭ ପଠାଯାଇଥିଲା । ବିମାନଟି ଯେଉଁ ଛାତର ପଡିଲା, ସେଠାରେ ୩ ଜଣ ମହିଳା ଏବଂ ଜଣେ ପୁରୁଷ ରହିଥିଲେ । ଘଟଣାସ୍ଥଳରେ ଦୁଇ ଜଣ ମହିଳାଙ୍କ ଜୀବନ ଚାଲିଯାଇଥିବା ବେଳେ ଅନ୍ୟ ଜଣେ ଡାକ୍ତରଖାନା ନେବା ବାଟରେ ମୃତ୍ୟୁବରଣ କରିଥିଲେ । ମୃତକଙ୍କ ପରିବାରକୁ ୫-୫ ଲକ୍ଷ ଟଙ୍କାର କ୍ଷତିପୂରଣ ଘୋଷଣା କରାଯାଇଛି । ଘଟଣାରେ ୨ ଘର ମଧ୍ୟ ନଷ୍ଟ ହୋଇଯାଇଛି ।
