ପୁରୀ : ଦେଶ ପାଇଁ ଜୀବନ ଦେଇ ତୁମେ ଆଜି ମହାନ ହୋଇଗଲ । ଦେଶ ମାତୃକା ପ୍ରତି ତୁମର ନିଷ୍ଠାର ସହ ଭଲ ପାଇବା ପାଇଁ ଆଜି ସାରା ଦେଶ ତୁମକୁ ଝୁରୁଛି । ହେ ବୀର ଯବାନ ତୁମକୁ ସତ ସଲାମ । ଦେଶ ମାତୃକା ପାଇଁ ଆପଣଙ୍କ ବଳିଦାନ ଅତୁଳନୀୟ । ଏ ଦେଶ ଏ ମାଟି ଆପଣଙ୍କ ବଳିଦାନ ପାଇଁ ସବୁବେଳେ ମନେ ରଖିବ । ଶହୀଦ ଦେବାଶିଷ ବିଶ୍ୱାଳ ଅମର ରହେ । ପୁଞ୍ଚରେ ଆତଙ୍କୀ ଆକ୍ରମଣରେ ସହିଦ ହୋଇଥିବା ସତ୍ୟବାଦୀର ସହିଦ ଦେବାଶିଷ ବିଶ୍ୱାଳ ପଞ୍ଚଭୂତରେ ଲୀନ ହୋଇଛନ୍ତି । ଜନ୍ମସ୍ଥାନ ଅଳଗୁମରେ ତାଙ୍କୁ ଅନ୍ତିମ ବିଦାୟ ଦିଆଯାଇଛି । ଅଳଗୁମ ଶ୍ମଶାନରେ ଶେଷ ଦର୍ଶନ ପରେ ଅନ୍ତିମ ସଂସ୍କାର ସମ୍ପନ୍ନ ହୋଇଛି । ତାଙ୍କ ପାର୍ଥିବ ଶରୀରକୁ ସମ୍ପର୍କୀୟ ମୁଖାଗ୍ନି ଦେବାପରେ ପଞ୍ଚଭୂତରେ ଲୀନ ହୋଇଛନ୍ତି ଶହୀଦ ଦେବାଶିଷ ।
ମୁଖାଗ୍ନି ପୂର୍ବରୁ ସେନା ପକ୍ଷରୁ ତାଙ୍କୁ ୨୧ ତୋପ ସଲାମ ଦିଆଯାଇଥିଲା । ଅମର ରହେ ଶହୀଦ ଦେବାଶିଷ ବିଶ୍ୱାଳ ଧ୍ୱନୀରେ ପ୍ରକମ୍ପିତ ହୋଇଥିଲା ଗାଁ ଶ୍ମଶାନ । ଶେଷ ଦର୍ଶନ ପାଇଁ ହଜାର ହଜାର ଲୋକଙ୍କ ଭିଡ଼ ପରିଲକ୍ଷିତ ହୋଇଥିଲା । ଆଖି ଲୁହରେ ଭିଜିଥିଲା ସତ୍ୟବାଦୀ ଅଳଗୁମ ଶ୍ମଶାନ । ଅନ୍ତିମ ସଂସ୍କାର ସମୟରେ ଲୋକଙ୍କ ଲୁହରେ ଭିଜିଥିଲା ଅଳଗୁମ ଶ୍ମଶାନ ପଡ଼ିଆ । ଶହୀଦ ଦେବାଶିଷ ଅମର ରହେ ନାରାରେ ପ୍ରକମ୍ପିତ ହୋଇଥିଲା ସମ୍ପୂର୍ଣ୍ଣ ସତ୍ୟବାଦୀ ।
ଏହା ପୂର୍ବରୁ ରାଷ୍ଟ୍ରୀୟ ସମ୍ମାନ ସହ ତ୍ରିରଙ୍ଗାରେ ଘୋଡ଼ାଯାଇ ତାଙ୍କ ପାର୍ଥିବ ଶରୀରକୁ ଶେଷ ଦର୍ଶନ ପାଇଁ କିଛି ସମୟ ରଖାଯାଇଥିଲା । ସତ୍ୟବାଦୀ ସମେତ ରାଜ୍ୟର ବିଭିନ୍ନ ପ୍ରତିଷ୍ଠିତ ବ୍ୟକ୍ତିମାନେ ଶହୀଦଙ୍କୁ ଶେଷ ବିଦାୟ ଦେଇଥିଲେ । ସୂଚନାଥାଉକି, ଗତ ଗୁରୁବାର ଅପରାହ୍ନରେ ଜମ୍ମୁକାଶ୍ମୀରର ପୁଞ୍ଚରେ ସେନା ଗାଡି ଉପରକୁ ଆତଙ୍କୀ ଆକ୍ରମଣ ହୋଇଥିଲା । ଏଥିରେ ରାଷ୍ଟ୍ରୀୟ ରାଇଫଲ୍ସର ୫ ଯବାନ ଶହୀଦ ହୋଇଯାଇଥିଲେ । ୫ ଯବାନଙ୍କ ମଧ୍ୟରେ ଓଡ଼ିଆ ଯବାନ ଦେବାଶିଷ ବିଶ୍ୱାଳ ମଧ୍ୟ ଶହୀଦ ହୋଇଥିଲେ ।
