ନମାଜ ପାଠ ବେଳେ ଭୟଙ୍କର ବିସ୍ଫୋରଣ । ବିସ୍ଫୋରଣରେ ୩୩ ଲୋକଙ୍କର ମୃତ୍ୟୁ ହୋଇଥିବା ବେଳେ ୪୩ ଜଣ ଆହତ ହୋଇଛନ୍ତି । ଏମିତି ଛାତିଥରା ବିସ୍ଫୋରଣ ଘଟିଛି ଆଫଗାନସ୍ତାନରେ । ଶୁକ୍ରବାର ରାତିରେ ଆଫଗାନିସ୍ତାନର କୁନ୍ଦୁଜ୍ ପ୍ରଦେଶ ଅନ୍ତର୍ଗତ ଏକ ମସଜିଦର ନମାଜ ପାଠ ସମୟରେ ବୋମା ବିସ୍ଫୋରଣ ଘଟିଥିଲା । ଏହି ହମଲା ପାଇଁ ଆତଙ୍କୀ ସଂଗଠନ ଆଇଏସଆଇଏସ୍ ନିଜକୁ ଦାୟୀ କରିଚି ।
ତାଲିବାନର ମୁଖପାତ୍ର ଜବିହୁଲ୍ଲା ମୁଜାହିଦ୍ ଟ୍ୱିଟ୍ କରି ଏହି ବିସ୍ଫୋରଣ ସମ୍ବନ୍ଧରେ ସୂଚନା ଦେଇଛନ୍ତି । ସେ ଏହି ନରସଂହାରକୁ ନିନ୍ଦା କରିବା ସହ ଶୋକସନ୍ତପ୍ତ ପରିବାର ଲୋକଙ୍କ ପ୍ରତି ଗଭୀର ସମବେଦନା ଜ୍ଞାପନ କରିଛନ୍ତି । ବିସ୍ଫୋରଣ ଯୋଗୁ ଶିଶୁଙ୍କ ସମେତ ୩୩ ଜଣ ମୃତ୍ୟୁ ହୋଇଛି ଏବଂ ୪୩ ଜଣ ଗୁରୁତର ଆହତ ହୋଇଛନ୍ତି । ଗତ ଦୁଇ ଦିନରେ ଆଫଗାନିସ୍ତାନରେ ଏହା ତୃତୀୟ ବିସ୍ଫୋରଣ । ଏହା ପୂର୍ବରୁ ଗୁରୁବାର ଏକ ମସଜିଦରେ ହୋଇଥିବା ବିସ୍ଫୋରଣରେ ୧୨ ଜଣଙ୍କର ମୃତ୍ୟୁ ହୋଇଥିବା ବେଳେ ୫୮ ଜଣ ଆହତ ହୋଇଥିଲେ । ସେହିପରି ଗୁରୁବାର ଆଉଏକ କୁନ୍ଦୁଜ ସହରରେ ଆଉଏକ ହମଲାରେ ୪ ଜଣ ନିହତ ହୋଇଥିବା ବେଳେ ୧୮ ଆହତ ହୋଇଥିଲେ
