ନୂଆଦିଲ୍ଲୀ : ଦିଲ୍ଲୀର ବୁରାଡି ସ୍ଥିତ କୌଶିକ ଏନକ୍ଲେଭରେ ଏକ ନିର୍ମାଣଧୀନ ୪ ମହଲା କୋଠା ଭୁଶୁଡ଼ି ପଡିଛି । ଏହି ଦୁର୍ଘଟଣାରେ ଜଣେ ୭ ବର୍ଷୀୟ ଶିଶୁ ଏବଂ ଅନ୍ୟ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ୧୨ଜଣଙ୍କୁ ବୁରାଡି ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ଏଥିରୁ ୫ ଜଣଙ୍କ ଅବସ୍ଥା ଗୁରୁତର ବୋଲି କୁହାଯାଉଛି । ସମସ୍ତଙ୍କ ଚିକିତ୍ସା ବୁରାଡି ସରକାରୀ ହସପିଟାଲରେ କରାଯାଉଛି । କୋଠା ଭୁଶୁଡିବାର ଖବର ପାଇ ଉଦ୍ଧାରୀକାରୀ ଦଳ ସଙ୍ଗେ ସଙ୍ଗେ ଉଦ୍ଧାର କାର୍ୟ୍ୟରେ ନିୟୋଜିତ ହୋଇଥିଲେ । ଏବେ ବି ଉଦ୍ଧାର କାର୍ୟ୍ୟ ଜାରି ରହିଛି । ଭଗ୍ନାବଶେଷ ତଳେ ଅନେକ ଲୋକେ ଫସିରହିଛନ୍ତି ବୋଲି କୁହାଯାଉଛି । ଘଟଣା ପରେ ସ୍ଥାନୀୟ ପ୍ରଶାସନ ଏବଂ ପୋଲିସ ଅଧିକାରୀ ଘଟଣା ସ୍ଥଳରେ ପହଞ୍ଚିଛନ୍ତି । ଘଟଣା ସୋମବାର ଦିନ ସନ୍ଧ୍ୟା ୭ ଟା ପରେ ଘଟିଛି । ଘଟଣା ପରେ ଅଞ୍ଚଳର କରେଣ୍ଟ କାଟିଦିଆଯାଇଛି ।
