ଜଗତସିଂହପୁର : ଜଗତସିଂହପୁର ଜିଲ୍ଲା ରିଟେଲର ଡ଼ିଲର ସଂଘ ପକ୍ଷରୁ ଜିଲ୍ଲା ଯୋଗାଣ କାର୍ଯ୍ୟାଳୟରେ ଜିଲ୍ଲାଯୋଗାଣ ଅଧିକାରୀ ଏବଂ ଉପଜିଲ୍ଲାପାଳ ପ୍ରଦୀପ କୁମାର ସାହୁଙ୍କୁ ଶତାଧିକ ରିଟେଲର ମାନେ ଉପସ୍ଥିତ ରହି ଦାବୀପତ୍ର ପ୍ରଦାନ କରିଛନ୍ତି । ୫ଦଫା ଦାବୀ ପୂରଣ ନିମନ୍ତେ ନିମନ୍ତେ ଡ଼ିଲରମାନେ ଦୀର୍ଘଦିନ ଧରି ବିଭାଗୀୟ ଅଧିକାରୀଙ୍କ ଠାରୁ ଆରମ୍ଭ କରି ମନ୍ତ୍ରୀଙ୍କ ପର୍ୟ୍ୟନ୍ତ ନେହୁରା ହୋଇଥିଲେ ମଧ୍ୟ ଏଥିପ୍ରତି କେହି ଦୃଷ୍ଟି ଦେଉନଥିଲେ । ଯାହାଫଳରେ ରିଟେଲର ଡ଼ିଲର ମାନେ ବିକ୍ଷୋଭ ପନ୍ଥା ଗ୍ରହଣ କରିବା ପାଇଁ ବାଧ୍ୟ ହୋଇଛନ୍ତି । ଦାବୀ ଅନୁଯାୟୀ ଡ଼ିଲରମାନେ କରୋନା ସମୟରେ ନିଜର ତଥା ନିଜ ପରିବାର ଜୀବନକୁ ବିପନ୍ନକରି ମାଗଣାରେ ଯୋଗାଇ ଦିଆଯାଇଥିବା ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ମାଧ୍ୟମରେ ଅତ୍ୟାବଶ୍ୟକୀୟ ସାମ୍ରଗୀ ଦୀର୍ଘ ୨୮ମାସ ଧରି ବିନା ପାରିଶ୍ରମିକରେ ବିତରଣ କରିଥିଲେ । ବାରମ୍ବାର ଦାବୀପରେ ରାଜ୍ୟ ସରକାର ମାତ୍ର ୬ମାସର ପାଉଣା ଦେଇ ଅବଶିଷ୍ଟ ୨୨ମାସ ପ୍ରାପ୍ୟ ଦେଇନାହାନ୍ତି । ଖୁଚୁରା ବିକ୍ରେତା ମାନେ ପ୍ରାପ୍ୟରୁ ବଞ୍ଚିତ ହେବା ଦୁର୍ଭାଗ୍ୟଜନକ ବୋଲି ଡ଼ିଲର ସଂଘପକ୍ଷରୁ ଅଭିଯୋଗ ହୋଇଛି । ଜଗତସିଂହପୁର ଡ଼ିଲର ସଂଘ ସଭାପତି ଶରତ ଚନ୍ଦ୍ର ସାହୁଙ୍କ ନେତୃତ୍ୱରେ ଜଗତସିଂହପୁର ଜିଲ୍ଲାର ସମସ୍ତ ଡ଼ିଲର ମାନେ ବିକ୍ଷୋଭ ପ୍ରଦର୍ଶନ କରିବା ସହ ଉପ-ଜିଲ୍ଲାପାଳ ଜିଲ୍ଲାଯୋଗାଣ ଅଧିକାରୀଙ୍କୁ ୫ଦଫା ସମ୍ବଳିତ ସ୍ମାରକପତ୍ର ପ୍ରଦାନ କରିଛନ୍ତି ।
