ନୂଆଦିଲ୍ଲୀ : ଜାପାନ ଏୟାରଲାଇନ୍ସ ଗୁରୁବାର ସକାଳୁ ସାଇବର ଆଟାକର ଶିକାର ହୋଇଛି । ଏହି ସାଇବର ଆଟାକ୍ ସମସ୍ୟା ଗୁରୁବାର ସକାଳ ପ୍ରାୟ ୭ଟା ୨୫ ମିନିଟରେ ଆରମ୍ଭ ହୋଇଥିଲା । ଏହାଦ୍ୱାରା ଏୟାରଲାଇନ୍ସର ଆଭ୍ୟନ୍ତରୀଣ ଏବଂ ବାହ୍ୟ ସିଷ୍ଟମ୍ ପ୍ରଭାବିତ ହୋଇଛି । ଏହି କାରଣରୁ ବହୁ ଘରୋଇ ଏବଂ ଅନ୍ତର୍ଜାତୀୟ ବିମାନ ପ୍ରଭାବିତ ହୋଇଛି । ପାଖାପାଖି ୧୪ଟି ଘରୋଇ ଉଡ଼ାଣରେ ୧ ଘଣ୍ଟା ବିଳମ୍ବ ଘଟିଛି । କିଛି ଅନ୍ତର୍ଜାତୀୟ ବିମାନ ଉଡ଼ାଣରେ ମଧ୍ୟ ସମାନ ସମସ୍ୟା ସୃଷ୍ଟି ହୋଇଛି । ସାଇବର ଆକ୍ରମଣ ହେତୁ ଟିକେଟଗୁଡ଼ିକର ବିକ୍ରି ବନ୍ଦ କରି ଦିଆଯାଇଛି । ଏୟାରଲାଇନ୍ସର ପ୍ରବକ୍ତା ଏ ବିଷୟରେ ସୂଚନା ଦେଇ କହିଛନ୍ତି, ଦିନର ଅବଶିଷ୍ଟ ସମୟରେ ସମସ୍ତ ଘରୋଇ ଏବଂ ଅନ୍ତର୍ଜାତୀୟ ଉଡ଼ାଣ ପାଇଁ ଟିକେଟ୍ ବିକ୍ରିକୁ ସ୍ଥଗିତ ରଖାଯାଇଛି । ତେବେ ଯେଉଁ ଯାତ୍ରୀମାନେ ପୂର୍ବରୁ ଟିକେଟ୍ କିଣିଥିଲେ, ସେମାନଙ୍କ ପାଇଁ ବୁକିଂ ବୈଧ ରହିବ ବୋଲି ପରାମର୍ଶ ଦିଆଯାଇଛି ।
