ପିପିଲି : ପୁରୀ ଜିଲ୍ଲା ଡେଲାଙ୍ଗ ଥାନା ଅଞ୍ଚଳରୁ ନାବାଳକ ଆଶୀର୍ବାଦ ସାହୁ ନିଖୋଜ ଘଟଣାର ପର୍ଦ୍ଦାଫାସ ହୋଇସାରିଛି । ଗତ ୧୫ ତାରିଖରେ ନିଖୋଜ ଆଶୀର୍ବାଦକୁ ଖୋଜିବା ପାଇଁ ପରିବାର ଠାରୁ ଆରମ୍ଭ କରି ପୋଲିସ୍ ପ୍ରଶାସନ ସମସ୍ତେ ନୟାନ୍ତ ହୋଇ ପଡିଥିଲେ । ଶେଷରେ ଦୀର୍ଘ ୬ଦିନ ପରେ ମିଳିଥିଲା ମୃତଦେହ । ଡେଲାଙ୍ଗ ଥାନା ରତନପୁର ଗାଁର ଜଣେ ବ୍ୟକ୍ତିଙ୍କ ଘର ପାଇଖାନା ଟାଙ୍କିରୁ ମିଳିଥିଲା ଆଶୀର୍ବାଦର ମୃତଦେହ । ପୋଲିସ୍ ସନ୍ଦେହରେ ଅଭିଯୁକ୍ତ ପଡୋଶୀ ଦାଦା ବାପି ସାହୁକୁ ଅଟକ ରଖି ପଚରା ଉଚରା କରିଥିଲା । ଆଉ ଶେଷରେ ଅଭିଯୁକ୍ତ ସବୁ ସତ କଥା ପୋଲିସ୍ ଆଗରେ ମାନିଥିଲା । ଗତକାଲି ଆଶୀର୍ବାଦର ମୃତଶରୀର ବ୍ୟବଛେଦ ପରେ ଗାଁ ଶ୍ମଶାନରେ ଅନ୍ତିମ ସଂସ୍କାର କରାଯାଇଥିଲା । ଏପଟେ ପ୍ରଶାସନ ପକ୍ଷରୁ ରେଡ଼କ୍ରସ୍ ସହାୟତା ରାଶି କୋଡିଏ ହଜାର ଟଙ୍କାକୁ ପ୍ରତ୍ୟାଖ୍ୟାନ କରାଯାଇଛି । ତେବେ ଏକ କୋଟି ଟଙ୍କାର ସହାୟତା ଦାବି କରିଛନ୍ତି ଅଞ୍ଚଳବାସୀ । ସେପଟେ ଅଭିଯୁକ୍ତ ପ୍ରଭାକର ସାହୁକୁ ଆଜି ଅପରାହ୍ନରେ ପିପିଲି କୋର୍ଟରେ ହଜାର କରାଯିବା ନେଇ ସୂଚନା ରହିଛି ।
