ମାଲକାନଗିରି: ଗର୍ଭବତୀ ମହିଳା ଏଚ୍ଆଇଭି ସଂକ୍ରମିତ ଥିବାକୁ ଚିକିତ୍ସା କଲେ ନାହିଁ ଡ଼ାକ୍ତର । ଏପରି ଅମାନବୀୟ ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ସ୍ଥିତ କୁଡ଼ୁମୁଲୁଗୁମ୍ମା ଅଞ୍ଚଳରେ । ଅଭିଯୋଗ ଅନୁଯାୟୀ, ମହିଳା ଜଣକୁ ଗର୍ଭ ଯନ୍ତ୍ରଣା ହେବାରୁ ପ୍ରସବ ପାଇଁ ପରିବାର ଲୋକେ ତାଙ୍କୁ ନିକଟସ୍ତ କୁଡ଼ୁମୁଲୁଗୁମ୍ମା ଗୋଷ୍ଟି ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ସେ ଏଚ୍ଆଇଭି ସଂକ୍ରମିତ ଥିବାରୁ ସେଠାରେ କାର୍ଯ୍ୟରତ ଡାକ୍ତର ତାଙ୍କୁ ଚିକିତ୍ସା କରିବେନି କହି ସିଧା ଫେରାଇ ଦେଇଥିଲେ । ଏବଂ ମହିଳାଙ୍କୁ ମାଲକାନଗିରି ମୁଖ୍ୟ ଚିକିତ୍ସାଳୟ ନେଇଯିବାକୁ କହିଥିଲେ ।
ସେ ଆହୁରି ମଧ୍ୟ କହିଥିଲେ ଯେ, ଯଦି ଏଠାରୁ ମହିଳାଙ୍କୁ ନେଇ ନଯିବେ ତାହେଲେ ମହିଳାଙ୍କର ପ୍ରସବ ହେଲେ ମଧ୍ୟ ଆମେ ଛୁଇଁବୁ ନାହିଁ । ଏପରିକି ଆମ୍ବୁଲାନ୍ସ ମଧ୍ୟ ମନାକରିଦେଇଥିଲା ମହିଳାଙ୍କୁ ନେବା ପାଇଁ । ଶେଷରେ ପରିବାର ଲୋକେ ତାଙ୍କୁ ବାଇକ ଯୋଗେ ଘରକୁ ନେିଥିଲେ । ଘରେ ପହଞ୍ଚିବା ପରେ ତାଙ୍କର ଏକ କନ୍ୟା ସନ୍ତାନ ଜନ୍ମ ହୋଇଥିଲା ।
ଏନେଇ ମାଲକାନଗିରି ସିଡିଏମ୍ଓ ଙ୍କୁ ପଚାରିବାରୁ, ସେ କହିଛନ୍ତି ଯେ, ଏପରି କିଛି ରିପୋର୍ଟ ମୋ ପାଖକୁ ଆସିନାହିଁ । ଆଉ ଯଦି ଏପରି ହୋଇଥାଏ, ତାହେଲେ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
