ନୂଆଦିଲ୍ଲୀ : ପିକ୍ ଟ୍ରାଫିକ ଆୱାର ବା ବ୍ୟସ୍ତବହୁଳ ସମୟ କାଳରେ ମୂଳ ଭଡ଼ାର ଦୁଇ ଗୁଣ ଚାର୍ଜ କରିପାରିବେ ପରିବହନକାରୀ ସଂସ୍ଥା। ସଡ଼କ ପରିବହନ ଓ ରାଜପଥ ମନ୍ତ୍ରାଳୟ ପକ୍ଷରୁ ଜାରି ମୋଟର ଯାନ ଏଗ୍ରିଗେଟର ଗାଇଡଲାଇନ ଅନୁସାରେ ଏହି ଭଡ଼ା ଲାଗୁ କରାଯାଇପାରିବ। ଗତକାଲିଠାରୁ ଏହି ନିୟମ କାର୍ୟ୍ୟକାରୀ ହୋଇଛି। ବର୍ତ୍ତମାନ ସୁଦ୍ଧା ଭଡ଼ାର ସର୍ବାଧିକ ସୀମା ଥିଲା ମୂଳ ଭଡ଼ାର ଦେଢ ଗୁଣ। ଆସନ୍ତା ୩ ମାସରେ ଏହି ଗାଇଡଲାଇନ କାର୍ୟ୍ୟକାରୀ କରିବା ଲାଗି ରାଜ୍ୟଗୁଡିକୁ ପରାମର୍ଶ ଦିଆଯାଇଛି। ବିଭିନ୍ନ ଯାତ୍ରୀ ପରିବହନକାରୀ ସଂସ୍ଥାର ଭଡ଼ା ନିୟନ୍ତ୍ରଣ କ୍ଷେତ୍ରରେ ରାଜ୍ୟ ସରକାରଙ୍କ ମଞ୍ଜୁରୀ ଆବଶ୍ୟକ ହୋଇଥାଏ। ଟ୍ରାଫିକ ଭିଡ଼, ଯାନ ସଂକ୍ରାନ୍ତ ପ୍ରଦୂଷଣ ଆଦିକୁ ଦୃଷ୍ଟିରେ ରଖି ସରକାର ଏହି ଗାଇଡଲାଇନ ସମ୍ପର୍କରେ ନିଷ୍ପତ୍ତି ନେବେ। ଗାଇଡଲାଇନର ଧାରା ୨୩ ଅନୁସାରେ ବିଭିନ୍ନ ଯାତ୍ରୀ ପରିବହନକାରୀ ଯାନ ଉପରେ ଦୈନିକ, ସାପ୍ତାହିକ କିମ୍ବା ପାକ୍ଷିକ ଲେଭି ଧାର୍ୟ୍ୟ କରିପାରିବେ। ନିୟମ ଅନୁସାରେ ସର୍ବନିମ୍ନ ୩ କିଲୋମିଟର ଲାଗି ଭଡ଼ା ଲାଗୁ ହେବ।
