ଭୁବନେଶ୍ୱର : ବିଜେପିର ପରବର୍ତ୍ତୀ ଟାର୍ଗେଟ ହେଉଛି ଓଡ଼ିଶା । ଆଗକୁ ଆସୁଛି ୨୦୨୪ ଲୋକସଭା ନିର୍ବାଚନ । ଏହା ପୂର୍ବରୁ ଚଳିତ ବର୍ଷ ୯ଟି ରାଜ୍ୟରେ ବିଧାନସଭା ନିର୍ବାଚନରେ କେନ୍ଦ୍ରରେ କ୍ଷମତାସୀନ ଥିବା ବିଜେପି ନିଜର ଶକ୍ତି ପରୀକ୍ଷା କରିବ । ତେବେ ଏହା ମଧ୍ୟରେ ଗତକାଲି ୩ଟି ରାଜ୍ୟର ବିଧାନସଭା ନିର୍ବାଚନର ଫଳାଫଳ ପ୍ରକାଶ ପାଇଛି । ତ୍ରିପୁରା ଓ ନାଗାଲାଣ୍ଡରେ ବିଜେପି ନିଜ ଦମରେ ସରକାର ଗଠନ କରିବାକୁ ସକ୍ଷମ ହୋଇଥିବା ବେଳେ ମେଘାଳୟରେ ନ୍ୟାସନାଲ ପିପୁଲ୍ସ ପାର୍ଟି (ଏନଏନପି) ସହ ମେଣ୍ଟ ସରକାର ଗଠନ କରିବାକୁ ଯାଉଛି । ଗତ ୨୦୧୯ ନିର୍ବାଚନରେ ବିଜେପି ଓଡ଼ିଶାରେ ଡବଲ ଇଞ୍ଜିନ ସରକାର ଗଠନର ନାରା ଦେଇଥିଲା ।
ଯଦିଓ ଦଳ ଏହି ଲକ୍ଷ୍ୟ ହାସଲ କରିବା କ୍ଷେତ୍ରରେ ବିଜେଡି ଆଗରେ ହାର ମାନିଥିଲା, ତଥାପି ଦଳ ଅଧିକ ସଂଖ୍ୟକ ଲୋକସଭା ଓ ବିଧାନସଭା ସିଟ୍ ଅକ୍ତିଆର କରିବାରେ ସକ୍ଷମ ହୋଇଥିଲା । ତେଣୁ ଏଥର ଓଡ଼ିଶାକୁ ନେଇ ଦିଲ୍ଲୀ ରାଜନୀତି ମଧ୍ୟ ଚଳଚଞ୍ଚଳ ହେଉଥିବା କୁହାଯାଉଛି । କେଉଁ ନେତାଙ୍କୁ କେଉଁ ଦାୟିତ୍ୱ ଦିଆଯିବ ତାହା କେନ୍ଦ୍ରୀୟ ନେତୃତ୍ୱ ସ୍ଥିର କରିବେ । ଓଡ଼ିଶାରେ କ୍ଷମତା ଅକ୍ତିଆର କରିବା ପାଇଁ ଚାଣକ୍ୟଙ୍କ ପେଡ଼ିରୁ ବାହାରିବ କୁକୁକ ଚାବିକାଠି ।ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ) ସରକାରଙ୍କ ଯୋଜନାକୁ ରାଜ୍ୟବାସୀଙ୍କ ନିକଟରେ ପହଞ୍ଚାଇ କିଭଳି ଭୋଟରଙ୍କୁ ଆକୃଷ୍ଟ କରାଯିବ ତାହା ଉପରେ ଫୋକସ୍ କରାଯିବ । ସେଥିପାଇଁ ବିଧାନସଭା ଓ ଲୋକସଭା ପାଇଁ ୨୦ ଜଣିଆ କୋର୍ କମିଟି ଗଠନ କରାଯିବ । ଏହି କମିଟି ପ୍ରତି ମାସରେ ବୈଠକ କରି କ୍ଷେତ୍ର ଦାୟିତ୍ୱରେ ଥିବା କେନ୍ଦ୍ରମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରିବେ । ଜନତାଙ୍କ ଭୋଟ ହାତେଇବା ଲକ୍ଷ୍ୟରେ ବିଜେପି ରାଜସ୍ଥାନରେ ଜନଆକ୍ରୋଶ ଯାତ୍ରା ଓ ତେଲେଙ୍ଗାନାରେ ପ୍ରଜାଗୋସା- ଭାଜପା ଭରୋସା ଯାତ୍ରା ଆରମ୍ଭ କରିଛି । ବିଭିନ୍ନ ରାଜ୍ୟର ପରିସ୍ଥିତି ଓ ଭବିଷ୍ୟତକୁ ଦୃଷ୍ଟିରେ ରଖି ଦଳ ଅଲଗା ଅଲଗା ରଣନୀତି ପ୍ରସ୍ତୁତ କରୁଛି । ତେଣୁ ଓଡ଼ିଶା ପାଇଁ ବିଜେପି ମଧ୍ୟ ସେପରି କିଛି ଖାସ୍ ପ୍ଲାନ ପ୍ରସ୍ତୁତ କରିବାକୁ ଯାଉଛି । କେନ୍ଦ୍ରୀୟ ନେତାମାନେ ଓଡ଼ିଶା ଗସ୍ତ ପରେ ଏହାର କାର୍ଯ୍ୟକାରିତା ବିଷୟରେ ସ୍ପଷ୍ଟ ହୋଇଯିବ ।
