ମୁମ୍ବାଇ : ମୁମ୍ବାଇ ଡୋମ୍ବିଭିଲି ଠାରେ ଥିବା ଏକ ରୟାସନ କାରଖାନାରେ ବିସ୍ଫୋରଣ ଓ ଅଗ୍ନିକାଣ୍ଡ ଘଟି ୮ ଜଣଙ୍କର ଜୀବନ ଚାଲି ଯାଇଛି । ଏହି ଦୁର୍ଘଟଣାରେ ୪୦ରୁ ଅଧିକ ଆହତ ହୋଇଛନ୍ତି । କାରଖାନାର ବିସ୍ଫୋରଣ ଏତେ ଅଧିକ ଥିଲା ଯେ ଆଖପାଖ କୋଠାରକାଚ ଝରକା ଭାଙ୍ଗି ଯିବା ସହ ଘର ଦୋହଲି ଯାଇଥିଲା । ଡୋମ୍ବିଭିଲି ଏମ୍ଆଇଡିସି ମହାରାଷ୍ଟ୍ର ଇଣ୍ଡଷ୍ଟ୍ରିଆଲ୍ ଡେଭଲପ୍ମେଣ୍ଟ କର୍ପୋରେସନ୍ ଶିଳ୍ପାଞ୍ଚଳରେ ଥିବା ଅମୁଦାନ କେମିକାଲ୍ କମ୍ପାନିର ବଏଲର ଫାଟିଯାଇ ପ୍ରଚଣ୍ଡ ବିସ୍ଫୋରଣ ହୋଇଥିଲା। ଭୟଙ୍କର ନିଆଁ ସମଗ୍ର କାରଖାନା ପରିସର ସହ ନିକଟସ୍ଥ ତିନିଟି ଅନ୍ୟ ଶିଳ୍ପ ପ୍ରତିଷ୍ଠାନକୁ ବ୍ୟାପିଯାଇଥିଲା।ସୂଚନା ପାଇ ଘଟଣାସ୍ଥଳକୁ ଥାନେ ପୌରନିଗମର ବିପର୍ୟ୍ୟୟ ପରିଚାଳନା ସେଲ୍ର ଏକ ଟିମ୍, ଏନ୍ଡିଆର୍ଏଫ୍ର ୧୩ଜଣିଆ ଟିମ୍, ୮ଟି ଦମକଳ ଗାଡ଼ି ସହ ଅଗ୍ନିଶମ ବାହିନୀ ପହଞ୍ଚିଥିଲେ। କାରଖାନା ମଧ୍ୟରୁ ପ୍ରାୟ ୭୦ଜଣ କର୍ମଚାରୀଙ୍କୁ ଉଦ୍ଧାର କରାଯାଇଥିଲା। ସେମାନଙ୍କ ମଧ୍ୟରୁ ୪୮ଜଣ ଆହତଙ୍କୁ ନିକଟସ୍ଥ ନେପ୍ଚ୍ୟୁନ୍ ଓ ଏମ୍ସ୍ ହସ୍ପିଟାଲ୍ରେ ଭର୍ତ୍ତି କରାଯାଇଛି। ୨ ମହିଳାଙ୍କ ସମେତ ୮ ଶ୍ରମିକଙ୍କ ମୃତ୍ୟୁ ଘଟିଛି। ଏହି ଘଟଣାରେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବିସ୍ ଦୁଃଖ ପ୍ରକାଶ କରିବା ସହ ଆହତଙ୍କୁ ଆବଶ୍ୟକ ଚିକିତ୍ସା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି।
