ଭଦ୍ରକ : ବ୍ରାଉନସୁଗାର ମାଫିଆଙ୍କ ଘରେ ରେଡ । ମୁଢି , ମିକ୍ସଚର, ଚାଉଳ ଡବାରୁ ବାହାରିଲା ପୁଳା ପୁଳା ଟଙ୍କା । ଏତେ ଟଙ୍କା ବାହାରିଥିଲେ ଯେ ହାତରେ ଗଣି ପାରିନଥିଲା । ତେଣୁ ଟଙ୍କା ଗଣିବା ପାଇଁ ମେସିନ୍ ଆଣିବାକୁ ପଡ଼ିଥିଲା । ଏବେ ମଧ୍ୟ ଚଢ଼ଉ ଜାରି ରହିଛି। ଏହି ଘଟଣାରେ ଭଦ୍ରକ ପୋଲିସ୍ ମହିଳା ବ୍ରାଉନ୍ସୁଗର ମାଫିଆଙ୍କୁ ଅଟକ ରଖି ପଚରାଉଚରା କରୁଛି । ବର୍ତ୍ତମାନ ସୁଦ୍ଧା ନଗଦ ୩୦ ଲକ୍ଷ ଟଙ୍କା ଓ ସୁନା ଜବତ ହେଲାଣି । ଏହା ସହ ୧୭ ଗ୍ରାମ ବ୍ରାଉନ ସୁଗର ବି ଜବତ ହୋଇଛି । ଭଦ୍ରକ ପୌରାଞ୍ଚଳ ଅଧିନ ଏଲଖା ନୟାନଗର ସ୍ଥିତ ଏକ ଭଡା ଘରେ ଓ ମିର୍ଜାପୁର ଅଞ୍ଚଳରେ ଚଢାଉ କରାଯାଇଛି । ଏଲଖା ନୟାନଗର ଅଞ୍ଚଳରୁ ୨୮ ଲକ୍ଷ ଟଙ୍କା ଓ ମିର୍ଜାପୁର ଅଞ୍ଚଳରୁ ପ୍ରାୟ ୨ ଲକ୍ଷ ଟଙ୍କା ଜବତ ହୋଇଛି । ଗତ କିଛି ଦିନ ହେବ ଏହି ଭଡ଼ା ଘରେ ବହୁ ବେଆଇନ କାର୍ୟ୍ୟ ଚାଲୁଥିବା ଏସପିଙ୍କ ନିକଟରେ ଅଭିଯୋଗ ହୋଇଥିଲା । ଭଦ୍ରକ ଏସପିଙ୍କ ନିର୍ଦ୍ଦେଶକ୍ରମେ ଅତିରିକ୍ତ ଏସପି ଅଂଶୁମାନ ଦ୍ବିବେଦୀଙ୍କ ନେତୃତ୍ବରେ ଭଦ୍ରକ ଟାଉନ ଥାନା ପୋଲିସ ଏବଂ ପୁରୁଣା ବଜାର ପୋଲିସ ମିଳିତ ଚଢାଉ କରିଥିଲେ । ମାମଲାରେ ସମ୍ପୃକ୍ତ ଜଣେ ମହିଳାଙ୍କୁ ଧରିଥିଲା ପୋଲିସ ।
