ଗଜପତି : ପୁଣି ଜନନୀ ଯନ୍ତ୍ରଣା । ଖଟିଆରେ ବୁହା ହେଲେ ଗର୍ଭବତୀ । ଗାଁକୁ ନାହିଁ ସବୁଦିନିଆ ପକ୍କା ରାସ୍ତା । ସମସ୍ୟା ଭୋଗୁଛନ୍ତି ଲୋକେ । ସ୍ୱାଧୀନତାର ୭୫ । ବର୍ଷ ପରେ ବି ଯାଇ ପାରୁନି ଆମ୍ବୁଲାନ୍ସ । ଏ ଦୃଶ୍ୟ ହେଉଛି ଗଜପତି ଜିଲ୍ଲା ରାୟଗଡ ବ୍ଲକ ଅଧିନ କରଡା ସିଂ ପଂଚାୟତ କଳମାସିଙ୍ଗି ଗ୍ରାମର । ରାସ୍ତା ସମସ୍ୟା ଯୋଗୁଁ ଗାଁକୁ ଯାଇ ପାରିଲା ନାହିଁ ଆମ୍ବୁଲାନ୍ସ । ଫଳରେ ଖଟିଆରେ ରୋଗୀଙ୍କୁ ବୋହି ଡାକ୍ତରଖାନା ନିଆଯାଉଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଦେଖନ୍ତୁ କିଭଳି ଭାବରେ ବର୍ଷା ସମୟରେ ଖଟିଆରେ ରୋଗୀଙ୍କୁ ବୋହି ନେଉଛନ୍ତି ପରିବାର ଲୋକେ । ବର୍ଷା ହେଉଥିବା ସମୟରେ ଗର୍ଭବତୀ ଧରିଛନ୍ତି ଛତା । ତେବେ ଏହି ସମୟରେ ଯଦି କୈାଣସି ଅସୁବିଧା ହୁଏ ତେବେ ଏଥିପ୍ରତି ଦାୟୀ ରହିବେ କିଏ ? ଗତ ବୁଧବାର ଦିନ ଘଟିଛି ଏଭଳି ଘଟଣା ।
ସୂଚନା ଅନୁଯାୟୀ , କଳମାସିଙ୍ଗି ଗ୍ରାମର ମିଟୁ ଶବରଙ୍କ ସ୍ତ୍ରୀ ମେରି ଶବର ଗର୍ଭବତୀ ଥିବା ବେଳେ କୈାଣସି କାରଣ ବଶତଃ ସେ ହଠାତ ପଡି ଯାଇଥିଲେ । ଫଳରେ ଗର୍ଭ ଯନ୍ତ୍ରଣା ହୋଇଥିଲା । ଗାଁକୁ ରାସ୍ତା ନ ଥିବାରୁ ଆମ୍ବୁଲାନ୍ସ ପହଁଚି ପାରି ନ ଥିଲା । ତେଣୁ ଚାଷ ଜମି ଦେଇ ପ୍ରାୟ ଦେଢ କିମି ଦୂର ମୁଖ୍ୟ ରାସ୍ତା ପର୍ଯ୍ୟନ୍ତ ବୋହିକି ନେଇଥିଲେ ପରିବାର ଲୋକେ । ବାଟରେ ପଡୁଥିବା କିତୁଙ୍ଗସିଂ ନାଳଲୋକଙ୍କ ସମସ୍ୟାକୁ ଦ୍ୱିଗୁଣିତ କରିଛି । ନାଳକୁ ପାର ହୋଇ ଯିବା ପାଇଁ ଲୋକେ ଭୟ କରୁଛନ୍ତି କାରଣ ଏହି ନାଳରେ ଥରେ ପଡିଗଲେ ଅବସ୍ଥା ଖରାପ ହୋଇଯିବ । ତେବେ ନାଳ ପାର ହୋଇ ଯିବା ପରେ ଅଟୋ ଯୋଗେ ଗର୍ଭବତୀଙ୍କୁ ପାରଳାଖେମୁଣ୍ଡି ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ତେବେ ନାଳ ଉପରେ ଏକ ପୋଲ ନିର୍ମାଣ କରିବା ପାଇଁ ଗ୍ରାମବାସୀ ଅନେକ ଦିନରୁ ଦାବି କରିଆସୁଥିଲେ ମଧ୍ୟ ଦାବ ପୂରଣ ହୋଇ ନ ଥିବା ଅଭିଯୋଗ କରିଛନ୍ତି ଗ୍ରାମବାସୀ । ଏ ସମ୍ପର୍କରେ ସ୍ଥାନୀୟ ସରପଂଚ ଉମାଶଙ୍କର ଭୂମରଙ୍କୁ ଯୋଗାଯୋଗ କରିବାରୁ ସେ କହିଥିଲେ ନାଳ ଉପରେ ପୋଲ ନିର୍ମଣ ପାଇଁ ପ୍ରସ୍ତାବ ଦିଆଯାଇଛି ।
