ଭୁବନେଶ୍ୱର : କଲବର କରିବ କୁହୁଡି । ୯ ଜିଲ୍ଲାକୁ ଅରେଞ୍ଜ ଆଲର୍ଟ । କଟକ, ଖୋର୍ଦ୍ଧା, ନୟାଗଡ, ପୁରୀ,ଜଗତସିଂହପୁର ପାଇଁ ଆଲର୍ଟ ଜାରି । କେନ୍ଦ୍ରାପଡା, ଭଦ୍ରକ, ବାଲେଶ୍ୱର ଓ କନ୍ଧମାଳରେ ବି କଲବଲ କରିବ କୁହୁଡି । ଆସନ୍ତା ୩ରୁ ୪ ଦିନ ଯାଏଁ ଅତି ଘନ କୁହୁଡି ସମ୍ଭାବନା । ତେଣୁ ଗାଡି ନେଇ ଯିବାକୁ ଥିଲେ ସତର୍କ ପରାମର୍ଶ ।
ପ୍ରବଳ ଶୀତ ସାଙ୍ଗକୁ ଘନ କୁହୁଡ଼ି ଓ ହେମାଳ ପବନ ଜନଜୀବନକୁ ଅସ୍ତବ୍ୟସ୍ତ କରି ପକାଇଛି । ଶୀତ ଓ ଘନ କୁହୁଡ଼ି ପାଇଁ ସକାଳ ୧୦ ଟା ପର୍ୟ୍ୟନ୍ତ ରାସ୍ତାରେ ଗାଡ଼ିମଟର ଚଳାଚଳ କମ ରହିଥିବା ଦେଖାଯାଇଛି । କୁହୁଡ଼ି ପାଇଁ ସୂର୍ୟ୍ୟଙ୍କ କିରଣ ମଧ୍ୟ ତେଜହୀନ ରହୁଥିବାରୁ ଶୀତ ଅଧିକ ଅନୁଭୁତ ହେଉଛି । ବଜାରଘାଟ ବି ଜନଶୂନ୍ୟ ହୋଇଯାଉଛି । ଥଣ୍ଡାରୁ ରକ୍ଷା ପାଇବାକୁ ଲୋକେ ନିଆଁ ଜାଳି ବସି ରହୁଥିବା ବେଳେ ଦେହମୁଣ୍ଡରେ ଗରମ ପୋଷାକ ପିନ୍ଧି ବାହାରୁଛନ୍ତି । ଚା ଦୋକାନରେ ଲୋକଙ୍କ ଭିଡ଼ ଦେଖିବାକୁ ମିଳୁଛି । ପାର୍ବତ୍ୟାଞ୍ଚଳ ଜି. ଉଦୟଗିରି, ଉଦଳା ଆଦି ଅଞ୍ଚଳରେ ଲୋକମାନେ ଅସହ୍ୟ ଜାଡ଼ରେ କଲବଲ ହେଉଥିବା ଦେଖାଯାଇଛି ।
