ନୂଆଦିଲ୍ଲୀ : ଆଜିଠୁ ଦିଲ୍ଲୀରେ ରେଖା ସରକାର । ୪ର୍ଥ ମହିଳା ମୁଖ୍ୟମନ୍ତ୍ରୀ ଭାବେ ଶପଥ ନେବେ ରେଖା ଗୁପ୍ତା । ଦିଲ୍ଲୀ ରାମଲିଲ୍ଲା ମୈଦାନରେ ହେବ ଶପଥ ଗ୍ରହଣ ଉତ୍ସବ । ତାଙ୍କ ପୂର୍ବରୁ ଆତିଶୀ, ଶୀଲା ଦୀକ୍ଷିତ ଓ ସୁଷମା ସ୍ବରାଜ ଦିଲ୍ଲୀର ମହିଳା ମୁଖ୍ୟମନ୍ତ୍ରୀ ଥିଲେ । ରେଖା ଗୁପ୍ତା ଶାଲିମାରବାଗ ବିଧାନସଭା ଆସନରୁ ନିର୍ବାଚିତ ହୋଇଛନ୍ତି । ୨୯ ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି । ଦିଲ୍ଲୀ ରାଜନୀତିରେ ତାଙ୍କର ବେଶ ଦବଦବା ରହିଛି ।ଦିଲ୍ଲୀ ବିଜେପିର ମହାସଚିବ ଓ ମହିଳା ମୋର୍ଚ୍ଚାର ରାଷ୍ଟ୍ରୀୟ ଉପାଧ୍ୟକ୍ଷ ଥିବା ରେଖା ଗୁପ୍ତା ଦକ୍ଷିଣ ଦିଲ୍ଲୀ ନଗର ନିଗମ ମେୟର ଭାବେ ଦାୟିତ୍ୱ ତୁଲାଇ ସାରିଛନ୍ତି । ରେଖା ଗୁପ୍ତା ୧୯୯୬-୯୭ରେ ଦିଲ୍ଲୀ ୟୁନିଭର୍ସିଟି ଛାତ୍ର ସଂଗଠନର ସଭାପତି ହୋଇଥିଲେ । ୨୦୦୭ରେ ନର୍ଥ ପିତାମପୁରାରୁ କାଉନସିଲର ଭାବେ ନିର୍ବାଚିତ ହେବା ପରେ ବହୁ ଉନ୍ନୟନମୂଳକ କାର୍ୟ୍ୟ କରିଥିଲେ। ୩ ଦଶନ୍ଧି ଧରି ସେ ବିଜେପି ସହ ସଂଶ୍ଳିଷ୍ଟ ଅଛନ୍ତି । ସେ ପ୍ରଥମ ଥର ପାଇଁ ବିଧାୟକ ଭାବେ ନିର୍ବାଚିତ ହୋଇଛନ୍ତି । ୩ ଥର କାଉନସିଲର ନିର୍ବାଚିତ ହୋଇଛନ୍ତି ।
